Op asselegoonsdag is alles veurbij

Dat waor ’t daan weer veur  e gans jaor. De pekskes kinne weer de kas in, de trömmelkes trök in hun does. Allein de echte volhawwers goon vendaog nog hieringe biete. ’t Waor ‘ne sjoene vastelaovend. Aon ’t weer heet ’t in eder geval neet gelege al wejde de wind soms get kaajd. Aon askruiskes doen veer neet mie. Dat sjeelt weer ‘ne gaank nao de kèrk. Meh 40 daog geinen alcohol is ouch ‘ne vörm vaan penitentie.

De res vaan de wereld is evekes boete beeld gewees. Dao zien nog get medaaljes gewonne in Zuid Korea, en dao is sjijns ‘ne minister aofgetrooje. En soms klinke nog get ander geluide vaan boete door. Zoe is dao altied weer Maarten van Rossem dee maag vertèlle tot carnaval get is veur achterleke samelevinge en tot ze dat in ’n groete stad wie Amsterdam neet nudeg höbbe umtotste dao altied al kins doen watste wèls.

Ocherm.  In Kölle en Düsseldorf en in de res vaan ’t Rheinland weurt eder jaor fanatiek carnaval gevierd. Dat zien miljoenestei in vergelieking boemèt Amsterdam ’n dörp aon ’t rendsje vaan Europa is. En Maarten van Rossem is dao d’n dörpsgek. Dao kinste noe en daan mèt lache meh de moos häöm veural neet serieus numme.

Euver Kölle gesproke: ’t motto veur de Rosenmontagszug veur volgend jaor 2019 is “Uns sproch es Heimat”, eus taol is eus thoes, um nog mer ins aon te geve wie belaankriek de taol is veur de identiteit vaan deginnege die ‘t spreke. Mèt al die leedsjes in ‘t dialek zouwste vastelaovend gerös ‘nen ieredeens veur eus taol kinne neume. Euver ‘ne maond of twelf is ’t weer zoe wied. Of wie ze in Kölle zègke: es ’t trömmelke sleit, daan zien veer weer paraat.

← Ga terug