Paul Weelen weurt zesteg en maak e leedsje

De verdeenste vaan Paul Weelen veur de Limburgse taol zien oonumstoetelek. Same mèt ziene partner Luiz Oliveira gief heer al jaore laank regelmaoteg Limburgstaolege beuk oet via zien oetgeverij TIC in Mestreech. En in zien eige Kirchröätsjer plat völt heer wekeleks ziene website mèt leedsjes en gediechte.

In mei weurt Paul Weelen zesteg. In plaots vaan zoe mer e fieske te geve bringk heer e nui leedsje oet. Dat is zie fieske. E lösteg, lente-achteg leedsje wat zien levesopvatting ’t bèste weergief.

Paul Weelen publiceert sinds 2009 wekeleks e leedsje op ziene website. De opnaomes daovaan maakde heer op ziene zolder, boe ’n besjeie studio is ingeriech. Iers späölde heer daodwerkelek alle instruminte zelf in. Dat rizzelteerde in de CD ‘D’r Ploem is doeëd’ en later ouch in de besjeie Limbo Top-10 hit ‘1000 reie vuur jouwe zin’.

‘Iech kan ’t nit geluive dat-s te bij miech bis’

‘Iech kan ’t nit geluive dat-s te bij miech bis’ is evels bij Marlstone opgenome mèt echte muzikante en is ‘t 500-ste leedsje wat op de site gepubliceerd weurt. Meh dao passe jaomer genóg gein 500 leedsjes op, dat zouw te groet zien veur ‘ne site. De leeedsjes vaan 2018, e paar CD’s en de leedsjes vaan 2019 stoon drop en zien dao te beluustere.

De video vaan ‘Iech kan ’t nit jeleuve dat-s te bij miech bis’ is deze kier gemaak door Bart-jan Barthelomeus, dee ouch al bekans alle leedsjes vaan ‘Oes de Elf’ en ‘Weerwaas’ vaan video’s voorzaog. Geer kint de video hei bekieke en beluustere.

← Ga terug