Platbook 18 geprizzenteerd: “Dinkend aon Limburg”

In ‘ne volle kaffee De Tramhalte in Remund is op zaoterdagmiddag 18 november de 18e oetgaof vaan ’t Platbook geprizzenteerd. Platbook is ’n serie beukskes boe-in dialeksjrijvers oet de ganse provincie eine kier per jaor hun ei kwiet kinne in de vörm vaan gediechte of verhaole. ’t Thema veur dit jaor waor “Dinkend aon Limburg”. Gasredacteur Guus Urlings, bekind vaan zien columns en artikele in De Limburger, zag in zien inleiing tot es heer persoenlek aon Limburg dach, häöm neet medein de gebrukeleke beelde vaan vastelaovend, vlaoj en Moder Maos veur de geis kaome. Zie beeld vaan Limburg is get kritischer en “gekruider” wie heer dat neumde. Neet alles wat in de provincie gebäört is jummers um euver op te sjöppe. Meh bij ’t make vaan ’n selectie oet de inzendinge veur dit Platbook heet heer oeteindelek toch de vörm laote prevalere bove d’n inhaajd.

’t Aontal inzenders waor deze kier e flink stök groeter es d’r pagina’s besjikbaar waore. Redacteur Urlings heet daan ouch hiel get lui mote oetlègke boeveur zie neet geselecteerd waore. Oonder de oetverkorene waore gerenommeerde sjrijvers wie Colla Bemelmans en G. Rapaille meh ouch minder bekinde en nuikoumers. ’t Rizzeltaot is ’n groete variatie aon tekste boebij sommege in de veerte nog doen dinke aon ’t bereumde gediech vaan Hendrik Marsman wat es inspritatiebron deende, andere hielemaol neet. Meh ze geve same e good beeld vaan op wat veur versjèllende menere me ziech tot eus Limburgse provincie kint verhawwe. De kortste inzending wèlle veer uuch neet oonthawwe. Ze is vaan Miel Vanstreels oet Mestreech:

Fietsentere
Euver achtien klums
Door ’t lefelek Mergelland
Stèllekes gesloop

Naotot streektaolfunctionaris Ton van Wijnbergen ’t ierste exemplaar had oetgereik aon redacteur Guus Urlings reep oetgever Paul Weelen versjeie vaan de aonwezege auteurs nao väöre um hunnen teks veur te drage. Dat lieverde d’n eine kier ‘n hilarisch verhaol op, d’n andere kier ‘n hiel reurend. En wie vol De Tramhalte ouch waor, de veurlezers kóste rekene op ’n aondachteg gehuur. Veur ‘n foto-impressie klik geer hei.

Platbook 18 “Dinkend aon Limburg” is veur € 9,90 te koup in versjèllende Limburgse bookhandels en te bestèlle via www.ticshop.nl en www.hklimburg.nl/webshop.

(Mestreechs)