Platbook euver Limburgse meziek geprizzenteerd

Zaoterdig 6 mei woor de prizzentasie van Platbook 17, deze keer in de óntvangsruumte van L1 ómdet in dit gebouw eindredacteur Henk Hover zien wèrkplek haet. De ruum 50 aanwezige, sjrievers en häöre aanhang, waerde eers getrakteerd op kóffie en flaaj, nag neet eerder vertoond in de Platbookhistorie volges oetgaever Paul Weelen. Veur belangsjtèllende woor d’r veuraaf ‘n róndjleiding door inkele sjtudio’s. Henk Hover vertèlde aansjloetend wie hae ‘t haaj aangepak óm oet 80 inzendinge de in zien ouge 35 bèste gedichte en verhaole mit es óngerwerp Meziek te keze, die in dit platbook ‘n plek höbbe gekrege. Wiejer maakde hae zich sjterk óm in gaodsnaam neet meer te kalle euver ós dialek, mer allein nag plat, Limburgs of taal/taol te gebroeke. Dyanne Sleijpen zorgde veur de muzikaal invuling.

Opnames

Anges woor deze keer det de sjrievers neet veur de aanwezige häör biejdrage kóste veurlaeze, mer det ze det noe deje in ein van de radiosjtudio’s wo häör gedich of verhaol waerde opgenaome, zodet die op ‘n later tiedsjtip nag ‘ns gebroek kènne waere in ‘t radioprogramma Plat-eweg. ‘t Beukske prizzenteert ‘n heel deil versjillende invalsheuk óm ‘t óngerwerp meziek te besjrieve: van processiemars, hertetango, jazz-mès, nachtegaal, de taal van Bók en Geit, Grameer, Libertango, jeugherinneringe, door meziek opgerope emoties, de zieke-ómroop,  wie ‘t zooj zin sónger meziek, sjlaagwerk, ‘t Gemingdj koeër en sjpele veur publiek toet ergernis euver dzjoeng dzjoeng-meziek en meziek es terreur óm d’r ‘n paar te numme De prizzentatie is te beloestere op de website vaan L1 Radio.

 

 

← Ga terug