Platbook: mie es 1200 pagina’s gesjreve Limburgs

’t Waor e bitteke e zjubelei bij de prizzentatie vaan de twintegste oetgaof vaan Platbook. 20 Platbeuk wèlt zègke tot dao de aofgeloupe 10 jaor mie es 1200 pagina’s mèt Limburgse poëzie en proza zien gevöld. En dat is bès get um evekes bij stèl te stoon. Dat doge daan ouch de diechters en sjrijvers en ander geïnteresseerde die op 17 november bijein waore gekoume in kaffee ’t Maashuuske in Illikhove. Paul Weelen nudegde de auteurs ein veur ein nao veure en vroog hun e stökske veur te lezen oet hun bijdrage aon Platbook 20, wat es thema “Det sjmaak nao mier” had. Dat thema waor hiel vrij ingevöld en góng bepaold neet allein euver culinair specialiteite, al waore d’r ouch odes aon roed moos en aon e gleeske beer.

Redacteur Ronald Colée

Veur de redacteur vaan dees aoflievering vaan Platbook, de Limburger-journalis Ronald Colée, voont de prizzentatie plaots op ’n bezunder locatie want zien awwers höbbe in ’t verleie ’t Maashuuske jaorelaank in beheer gehad. Ronald Colée selecteerde veerteg tekste oet in totaal bekans negeteg inzendinge oet de ganse provincie. Dao-oonder waore bedreve auteurs die al ‘ne gooje naom höbbe opgebouwd in de Limburgse literatuur, meh ouch versjèllende nuikoumers. Ronald Colée: “Iech hob miech mage laove aon wäörd wie boajbreukske, koekake, krollemol, klevièterkes, rainiejoeng en zevezöldersgezich en dat sjmaakde good.”

Euver Platbook

Platbook is bedoeld veur Limburgstaolege sjrijvers en – lezers. De boondels weure oetgegeve in opdrach vaan ’t Hoes veur de Kunste Limburg in samewèrking mèt Veldeke Limburg, de Raod veur ’t Limburgs, de Stiechting Lilili, oetgeverij TIC en Wim Kuipers. Auteurs oet de ganse provinjcie wèrke mèt um ederskies ’n ander thema te besjrieve in hun eige verhaole, gediechte en andersoortege tekste. Platbook 20 is evenes alle veurgaonde nómmers veur € 9,90 te koup in versjeie Limburgse bookwinkels, en ouch via de websjop vaan Oetgeverij TIC.

Gesjreve Limburgs

Um ’n taol levend te hawwe moot ze neet allein gesproke meh ouch gesjreve weure. Wee sjrijf dee blijf, dat gelt ouch veur ’t Limburgs. Door te sjrieve kinne veer eus taol, meh ouch eus gedachte en eus historie, doorgeve aon ’t naogeslach en kinne veer trökleze wat eus veurawwers in sjrif veur us bewaord höbbe. Meh väöl lui die Limburgs spreke höbbe meujte mèt Limburgs sjrieve. Ze dinke tot de spellingsregels zoe ingewikkeld zien tot ze neet ins wèlle beginne um die te begriepe. Of ze veule ziech gegeneerd um op foute betrap te weure. Gelökkeg liekent de jäög dao minder las vaan te höbbe: die appe en twittere d’r lösteg op los in hun moojerstaol, boebij ze ziech neet drök make euver e leesteike mie of minder. En zoe huurt ’t ouch: ’t is belaankrieker tót in ’t Limburgs gesjreve weurt es wie tot dat zjus gesjreve weurt. Die spellingsregels koume later nog wel nao väöre. En mesjiens kinne veer die regels daan ouch nog ‘ns ‘ne kier get minder ingewikkeld make.

Wim Kuipers heet ziech altied ingezat veur ’t gesjreve Limburgs. Heer heet zelfs al geperbeerd um te koume tot ’n Algemein Gesjreve Limburgs, meh dat is häöm op ‘nen houp kritiek koume te stoon. Um vaan al die plaotseleke dialekte éin taol te make, daoveur waore de geiste in Limburg nog lang neet riep; en mesjiens zalle ze dat ouch noets weure. Meh de kins ouch in versjèllende dialekte zoe sjrieve tot ze veur ederein dee Limburgs sprik te begriepe zien. En los daovaan heet Wim Kuipers door zien columns in de gezèt (De Letterbak), door ziene poëziemailservice (Veldgewas), door zien initiatief veur ’t oetgeve vaan Platbook en recentelek door zien rubriek Lidioom op de website vaan Veldeke, ziech altied sterk gemaak veur ’t gesjreve Limburgs. En noe heet heer 2019 oetgerope tot ’t Jaor vaan ’t gesjreve Limburgs. Veer zalle zien boe us dat bringk. Meh tot ’t gesjreve Limburgs ’n duike in de rögk good kint gebruke, dat steit wie ‘ne paol bove water.