Podcast: De Limburgse taal & de zorg
Mèt Jan Hamers, Lubert Priems en Frans Pollux.
In opdrach vaan de Stiechting LIMx en mèt financieel steun vaan de provincie Limburg en Veldeke Limburg make Ruud Kleinen en Harry Rouschop ‘ne podcast euver de Limburgse taol: “De Limburgse taol & …”. Zie oonderzeuke wat veur rol ’t dialek späölt in de Limburgse maotsjappij. Frans Pollux maak veur eder aoflievering ‘ne muzikaole column.
Vanaof noe is aoflievering 11 vaan de podcast te beluustere boe-in de zörg centraol steit. Es gas zien Prof. dr. Jan Hamers en Lubert Priems vaan de stiechting Laudio aongesjove. Prof. dr. Jan Hamers is hoeglieraar Ouderenzorg aon de Universiteit Mestreech en veurzitter vaan de Academische wèrkplaots Ouderenzorg Limburg. Heer zou ’t jaomer vinde es dao bewus neet mie Limburgs gepraot weurt.
Veural veur awwer en kwetsbaar lui is (moojer)taol erg belaankriek, ’t gief e veileg geveul. Jan Hamers heet recentelek oonderzeuk gedoon nao de effekte vaan de coronamaotregele in de verzörgingshoezer. Heer waarsjouwde al in e vreug stadium veur de negatief effekte vaan de streng maotregele roontelum de bezeukregeling op de bewoeners vaan de verzörgingshoezer. In verband mèt de terminologie vint heer ’t meujelek um in ’t dialek euver zie werk te praote. Meh ’t gans interview blijf heer zie Kèrkraojs dialek zoe väöl meugelek trouw.
Oet onderzeuk bliek tot awwer lui gelökkeger en zelfstandeger weure es ze hun thoestaol hure en kinne spreke. Daorum heet de Stiechting Laudio mèt ’t projek Mia ’n speciaol kamer ingeriech veur awwer lui um dat ins te koume ervare. Dao wandelt me letterlek in ’n Limburgse klaankkas. Wee dao de deure ope deit, huurt Mia zelf. Miestal in häör eige taol, soms in die ander, ’t Hollands. Umtot me in e verzörgingshoes noe einmaol mèt ederein moot same woene. Mia krijg oondertösse naovolging in ander provincies. Documentairemaker Lubert Priems vertèlt dao euver. Frans Pollux lègk oet wat veur aol ’t mies gesjik is veur akelege krenkdes.
Alle aoflieveringe zien te beluustere via deze website en via versjèllende podcastplatforms boe-oonder Spotify, Apple Podcasts, Google Podcast en Anchor. Eder 14 daog versjijnt ’n nui aoflievering.