Podcast De Limburgse Taal & … d’n oondernummer

In opdrach vaan de Stiechting LIMx en mèt financiële steun vaan de provincie Limburg en Veldeke Limburg lancere Ruud Kleinen en Harry Rouschop ‘ne podcast euver ’t Limburgs dialek oonder d’n titel “De Limburgse taal & …”. Ze oonderzeuke wat veur rol ’t dialek späölt in de Limburgse maotsjappij. Frans Pollux slut edere podcast aof mèt ‘ne muzikale column.

Vaanaof noe is aoflievering 2 te beluustere, boe-in d’n oondernummer centraol steit. Te gas zien Huub Narinx (directeur vaan de Limburgse Wergevers Vereineging) en staar-chef Hans van Wolde.

“Taol is ’t mechtegste waope um verbinding te make en dialek kint daobij zeker ’n rol speule, meh sleet niemes oet”. Dat zeet LWV-directeur Huub Narinx. Heer constateert ouch tot ’t käörmerk “Made in Limburg” nog aondach behoof. Euver ’t veurtbestoon vaan eus dialek maak heer ziech minder zörg.

Stare-chef Hans van Wolde (Rotterdam 1963) is oondertösse gans geïntegreerd in Limburg en heer begrip de Limburger. Heer vertèlt euver zien avontuur Brut 172 en d’n aonstaonde documentaire dao-euver op RTL4. Es lèste fileert Frans Pollux podcastgas Huub Narinx in ziene muzikaole column.

De Podcast “De Limburgse taal & …” is te beluustere via diverse platforms boe-oonder Spotify, Apple Podcasts en Anchor. Eder 14 daog versjijnt ’n nui aoflievering. De aolievering mèt Huub Narinx en Hans van Wolde kint geer beluustere op deze website. En es geer op dee website get wijer nao oonder scrolt vint geer ouch d’n trailer vaan de podcastserie en de ierste aoflievering mèt wetensjapper Leonie Cornips.

 

 

← Ga terug