Podcast De Limburgse taal & … Vastelaovend

In de serie Podcasts De Limburgse taal &… prizzentere de makers Ruud Kleinen (L1 Radio en TV), Harry Rouschop (LIMx) en Frans Pollux (zenger en prizzentator) de veerde aoflievering oonder d’n titel ”De Limburgse taal &… Vastelaovend” mèt es gaste Tom Doesborg en Marleen Rutten.

Zie oonderzeuke dao-in wat veur rol de versjèllende Limburgse dialekte speule in de Limburgse maotsjappij. Frans Pollux maak veur eder aoflievering ‘ne muzikaole column. Noe is aoflievering 4 vaan de podcast te beluustere boe-in de rol vaan ’t Limburgs bij de Vastelaovend centraol steit.

Vastelaovend is de motor vaan ’t Limburgs dialek. Dat zeet Tom Doesborg, mister Vastelaovend vaan L1. ’t Dialek steit noe daan ouch beter deveur es 50 jaor geleie meh dat wèlt neet zègke tot dao gein oonderhaajd nudeg is. Integendeil.

Zengeres en logopediste Marleen Rutten adviseert awwers ummertouw um dialek te praote mèt hun kinder. Nederlands liere geit otomatisch dus “kal thoes lekker plat”.

Frans Pollux verras vrund Tom Doesborg mèt ’n extra couplèt in zienen oonnaovolgabare muzikaole column.

De aoflievering is te beluustere via deze website en via versjèllende podcast platforms boe-oonder Spotify, Apple Podcasts en Anchor. Eder 14 daog versjijnt ’n nui aoflievering

 

 

← Ga terug