Podcast De Limburgse taol & … de media

Ouch de podcastserie “De Limburgse taal & …” besteit aondach aon d’n UNESCO “internationaolen daag vaan de Moojertaol”. Taole zien ’t instrumint um ’t cultureel erfgood levend te hawwe. Door de moojertaol in iere te hawwe, blijf de taolkundeg en cultureel traditie bestoon en weurt me ziech mie bewus vaan de versjèlle tösse etnische gróppe.

De podcastserie “De Limburgse taol &…” behandelt ’t Limburgs dialek. In opdrach vaan de Stiechting LIMx en mèt financieel steun vaan de provincie Limburg en Veldeke Limburg oonderzeuke Ruud Kleinen en Harry Rouschop wat veur rol ’t dialek späölt in de Limburgse maotsjappij. Frans Pollux maak veur eder aoflievering ‘ne muzikaole column.

Vaanaof noe is aoflievering 5 vaan de podcast te beluustere boe-in de media centraol stoon, en daan in ’t bezunder de regionaolen umroop L1. Te gas zien Leo hauben vaan L1 en Fons Lambie vaan RTL. ’t Levend hawwe vaan dialek is ’n taak vaan L1. Leo Hauben, hoofredacteur vaan de regionaolen umroop zit evels mèt ’n dilemma. Dialek slut naomelek ouch oet. In dees aoflievering vertèlt heer wie L1 heimèt um geit.

Volgens häöm kleurt eus streektaol d’n umroop nog ummertouw broonsgreun. ’n Accent, zoe wie ’n zachte G, maag neet aofleie vaan d’n inhaajd vaan ’n item. Daorum heet Frans Lambie, polletiek verslaaggever vaan RTL, in zien beginjaore in Hilversum en Den Haag logopedie gevolg. Meh heer dink nog altied in ’t Eckelraods dialek. ’t Eind is weer gerizzerveerd veur columnis Frans Pollux. Heer bezingk L1 baas Leo Hauben. Kump good!

De aoflieveringe zien te beluustere via deze website en via versjèllende podcastplatforms boe-oonder Spotify, Apple Podcasts, Google Podcast en Anchor. Eder 14 daog versjiijn ’n nui aoflievering.