Podcast: De Limburgse taol & Humor

Vaanoaf noe is aoflievering 9 vaan de podcast De Limburgse taol & … te beluustere boe-in humor centraol steit. Es gaste zien cabberetier Raymond Clement en buuttereedner Bas van Neer aongesjove.

In opdrach vaan de Stiechting LIMx en mèt financieel steun vaan de provincie Limburg en Veldeke Limburg make Ruud Kleinen en Harry Rouschop ‘ne podcast euver de Limburgse taol: “De Limburgse taol & …”. Zie oonderzeuke wat veur rol ’t dialek späölt in de Limburgse maotsjappij. Frans Pollux maak veur eder aoflievering ‘ne muzikaole column.

Limburgsen humor liekent veural veurbehawwe aon de buut. Cabberetier Raymon Clement is ’n oetzundering. Opgegreujd in e werm nès umgeve mèt cabberèt en theater heet heer ziech touwgelag op ’t mie maotsjappelek kritisch cabberèt. Heer slut steevas ’t jaor aof in ’t Parkstad Limburg Theater mèt zien Awwejaorsconference. Dialek heet de meugelekheid um hel oetspraoke zachter te make. ‘t Zouw allein al mote blieve bestoon umtotste dao zoe sjiek in kins vloke. Heer heet ouch ’n kemissie veur alle dialekpuriste: gebruuk ’t dialek veural functioneel. Want wie geforceerder totste get perbeers te besjerme, wie vlotter ’t brik.

Buuttekampioen 2019 Bas van Neer vint tot de grens vaan de traditioneel buut wel get opgerèk maag weure. De gemiddelde leeftied vaan de buuttereedner ligk momenteel bove de 50 jaor. Daorum moot veural energie gestoke weure in de gróp joonk-volwasse buuttereedners. Heer wèlt gere in de vootspore trejje vaan Raymon Clement. Heer heet momenteel zaank- en gitaarlès en wèrk aon ’n aovendvöllend program veur klein zaole. Raymond Clement oondersteunt häöm daobij.

Frans Pollux kump in ziene column tot de oontdèkking tot ouch deze podcast aon ’t subsidie-infuus hingk. Luuster mer ins. Alle aoflieveringe zien te beluustere via deze website en via versjèllende podcastplatforms boe-oonder Spotify, Apple Podcasts, Google Podcast en Anchor. Eder 14 daog versjijnt ’n nui aoflievering.

 

← Ga terug