Podcast euver de Limburgse taol

In opdrach vaan de Stiechting LIMx en mèt financiële steun vaan de provincie Limburg en Veldeke Limburg lancere Ruud Kleinen en Harry Rouschop ‘ne podcast euver ’t Limburgs dialek oonder d’n titel “De Limburgse taal & …”. Sinds 1997 weurt de Limburgse taol door de Nederlandse en provincoal euverheid officieel erkind es streektaol. In 2019 woort dit nog ins bevesteg in e convenant. Toch make väöl Limburgers ziech zörg euver d’n touwkoms vaan eus dialek.

In deze podcastserie oonderzeuke Ruud Kleinen en Harry Rouschop aon de hand vaan interviews mèt ervaringsdeskundege wie ’t noe eigelek deveur steit mèt ’t gesproke Limburgse woord. Wat veur rol späölt de Limburgse taol in beveurbeeld ’t oonderwies, ‘t bedriefsleve, de cultuur en de polletiek. Bekinde Limburgers vertèlle euver hunne band met ’t dialek en Frans Pollux slut edere podcast aof mèt ‘ne muzikale column.

Podcast 1: Mèt Leonie Cornips, Suzan Seegers en Frans Pollux

In de ierste aoflievering is Leonie Cornips, bezunder hoeglieraar taolcultuur in Limburg, te gas. Dialek es luustertaol, dat zuut Leonie Cornips wel zitte. Daobij kinne veer volgens häör nog get liere vaan de Scandinavische len. Ze zuut de touwkoms vaan eus dialek soomber in meh de euverheid kint helpe ’t tij te kiere. Ouch verklap Leonie Cornips häör favoriet dialekwoord. Suzan Seegers vertèlt boerum ze gere in ’t Limburgs zingk en Frans Pollux slut aof mèt ‘ne melodieuze column.

De Podcast De Limburgse taal & …” is te beluustere via diverse platforms boe-oonder Spotify, Apple Podcasts en Anchor. Eder 14 daog versjijnt ’n nui aoflievering. D’n introductietrailer en de ierste aoflievering mèt Leonie Cornips zien te beluustere via deze website

De makers

Ruud Kleinen (Heerle 1978) prizzenteert edere wèrkdaag ’t radioprogram Route Regio bij de Limburgse regionaolen umroop L1. Heer maak en prizzenteert5 ouch versjèllende tv-programs en is documentairemaker. Mèt ‘ne vaajer oet Waubach en ’n moojer oet Eys greujde heer op in Rimburg. Ruud neump zien eige plat dan ouch “fusion” en kint neet wachte dat aon zoe väöl meugelek lui te laote hure.

Harry Rouschop (Sint Gietere 1964) is opriechter en projekmanager vaan de Stiechting Limx. Dees stiechting zèt ziech oonder mie in veur ’t behaajd vaan ’t Limburgs dialek. Dat deit ze door middel vaan diverse projekte boe-oonder deze podcast. Es gebore en getoge “Jong oet Segietere” sprik en huurt heer gere dialek. De pop-up studio veur deze podcast steit in zie woenhoes in Sint Gietere.

Frans Pollux (Tegelen 1971) studeerde gesjiedenis, wouw sjriever weure, woort muzikant, góng wèrke bij de radio en daonao bij d’n tèllevisie, is oondertösse columnis bij de Limburger en steit daoneve op alderhand podia es zenger, prizzentator, vertèller of daagveurzitter. Veur deze podcast maak Frans Pollux ederskier ‘ne muzikale column geïnspireerd op ‘t thema vaan de aoflievering.

← Ga terug