Podcast: Limburgse taol & oonderwies

In opdrach vaan de Stiechting LIMx en mèt financieel steun vaan de provincie Limburg en Veldeke Limburg make Ruud Kleinen en Harry Rouschop ‘ne podcast euver de Limburgse taol: “De Limburgse taol & …”. Zie oonderzeuke wat veur rol ’t dialek späölt in de Limburgse maotsjappij. Frans Pollux maak veur eder aoflievering ‘ne muzikaole column.

Vaanoaf noe is aoflievering 8 vaan de podcast te beluustere boe-in ’t oonderwies centraol steit. Es gaste zien Esther van Loo, Ilse Keulers, Lotte van Loo en Frans Pollux aongesjove. Veur de taoloontwikkeling is ’t good es kinder al vreug in aonraking koume mèt versjèllende taole. ’t Veurdeil wat Limburgse kinder in dat opziech höbbe weurt evels oonvoldoende oetgenöt.

Esther van Loo, veurzitter vaan de sectie Limburg vaan de vereineging LevenTalen lègk oet wat ‘t 3M-projek heibij kint beteikene. Discussies euver de sjriefwijs vaan de versjèllende dialekte zien volgens häör verspèlde energie, steek die energie lever in de spreektaol. Ouch veur volwassene is dao nog hoop, Limburgs is naomelek ouch op awwere leeftied nog te liere.

Lotte van Loo en Ilse Keulers vaan ’t Sophianum oet Gölpe doge veur hun profielwèrkstök oonderzeuk nao de taoloontwikkeling bij kinder oet gróp 2. Ouch oet hun oonderzeuk bliek tot kinder die mietaoleg weure opgeveujd beter score op taolgebeed es kinder die allein Nederlands spreke. ’t Wèrkstök woort gewaardeerd mèt ‘n 10 en ‘ne stimuleringspries vaan Levende Talen.

En wie kump Emil Sarkowicz verzeild in de column vaan Frans Pollux? Luuster mer ins.  Alle aoflieveringe zien te beluustere via deze website en via versjèllende podcastplatforms boe-oonder Spotify, Apple Podcasts, Google Podcast en Anchor. Eder 14 daog versjijnt ’n nui aoflievering.

 

← Ga terug