Poëziefestival Gelselaar noe ouch opegestèld veur Limburgse taol

Poëzie nump in ‘t Achterhoekse dörp Gelselaar ‘nen hoege vlöch. ’t Grenseuverstijgende poëziefestival dao woort in korten tied populair. De Nederlandstaolege editie trok neve Nederlandse diechters ouch deilnummer oet Belsj. Nedersaksische gediechte kaome in 2021 ouch binne oet Duitsland. Veur de poëziewedstrijde vaan dit jaor is es thema gekoze veur “Mien taol”. Väöl mie diechters kriege zoe ‘ne kans. Noe weure ouch gediechte in ’t dialek oet ander deile vaan Nederland en Vlaondere touwgelaote, zoe wie ouch in ’t Fries en ’t Afrikaons. Wee deil wèlt numme deent uterlek 1 augustus 2022 e gediech in te sjikke. Alle informatie euver opzat en regels en euver ’t festival zelf stoon op de festivalwebsite. D’n twiede zaoterdag in oktober (8 oktober 2022) is gekoze es vasten daotum veur ’t aofsletende fies. De winners oontvaange ‘ne passende pries.

Vröch vaan ‘nen awwen appelboum

’t Poëziefestival is de vröch vaan ‘nen awwen appelboum, bij de monumentaol boerderij Winkels aond de Dörpstraot in Gelselaar. De Cultureel Stiechting Bie Winkels organiseerde, geïnspireerd door dee vröchboum, in 2019 veur d’n ierste kier ‘nen Appeldaag. Poëzieleefhöbbers op hun beurt brachte ’t idee aon veur e fies wat direk oetgreujde tot ’n hoegtepunt vaan d’n Appeldaag.

Mèt achtereinvolgend de thema’s appel, bron en zwalber (boe ouch e groet vertaolprojek aon is gekoppeld) veur poëziewedstrijde, oontgreujde ’t projek de organiserende stiechting. In good euverlègk is daorum beslote aon te slete bij de tijdelek slaopende Stiechting Portfolio, die in ’t verleie vergeliekbaar activiteite op poëziegebeed oondernaom.

Eige festivalwebsite

’t Kleinsjaoeleg begonne Gelselaars poëziefestival wèrk mèt beperkde middele. Allewel ouch via YouTube fèlmkes en livestreams wereldwied aondach weurt gevesteg op de activiteite, besjikde de organisatore neet euver ‘nen eige website. Ze maakde gebruuk vaan ‘ne gratis blog veur d’n Appeldaag. De Stiechting Portfolio maakde op häöre site medein ruimte veur de poëzieprojekte en gaof die ouch ’n eige geziech mèt ’t oontwerpe vaan logo’s. Op de foto de lede van de projekgróp Poëziefestival Gelselaar mèt ‘t bestuur vaan de gasvrij Stiechting Portfolio. Vaan links nao rechs Jacobus Trijsburg, Gerrit Klaassen, Sander Grootendorst, Arend Heideman, Jaap Nijstad en Jopie Beumkes.

Podium veur Limburgstaolege poëzie

Zoe lang es in Limburg gein alternatief is gevoonde veur de opgeheve serie Platbook, beejt ’t Poëziefestival Gelselaar in eder geval de meugelekheid um ouch veur Limburgstaolege diechters e podium te vinde en mesjiens zelfs ’ne pries te winne. Insjikke mèt es thema “Mien taol” kint tot 1 augustus via de festivalwebsite.

 

← Ga terug