Poëziewanjeling in Staeveswaert

Dit jaor organiseertj Veldeke Krink Ech väör de dördje kieër ’n poëziewanjeling en waal in Staeveswaert. De klein kern van ’t stedje lieëntj zich dao good väör. De plaatselike vereniging “Amice Insulae” (Vrunj van ’t eilandj in de Maas) haet same mit oze Krink de organisatie op zich genómme.

Dees wanjeling is op woonsdig 26 augustus lekker taege de aovendj en w’r raekene daobie natuurlik op sjoan waer.  Ze veurtj langs bekèndje plekke, mer is gein róndjleijing mit oetlèk. Speciaal aan dees  wanjeling is, det op versjillendje plekke ’n tiedje weurtj stil gestange óm te loestere nao ’n väördracht (gedich of verhaol) en/of nao meziek.

W’r loupe in 2 groepe van max. 30, zoadet de väördrachte ouch good te verstaon zeen.  Mitwèrking väör dees intermezzo’s höbbe w’r weer gezóchtj en gekrege bie de sjievers van de Sjrieverskrink Midde Limburg en bie ’n aantal muzikante oet dees ómgaeving.

Waem mit geit loupe mót raekening haoje mit ruum ’n oer tót óngerhalf oer wanjele en staon. Mit rollator zal det neet gaon. Stevige sjoon is aan te bevaele. Nao aafloup van de wanjeling kan m’n get drènke in de Maaspaort.

Alle deilnummers waere óm 19.30 oer verwachtj bie ’t vertrèkpuntj. Det is de parkeerplaats taegenäöver de voetbalveljer op de waeg nao ‘t  Broox.  Van dees parkeerplaats aaf zólle w’r ouch vertrèkke. Det kan beteikene det ‘ne groep get langer mót wachte, bie ’t vertrèk of verder ónger ’t wanjele. De  angere groep nao aafloup wachte tót ederein bönne is. Bie slech waer geit ’t neet door en sjuuftj ‘t 2 waeke op.

Mer lètj op: door groate belangstèlling is ’t noe neet mieë mäögelik op te gaeve väör deilname. Det is jaomer. ’t Bestuur wiltj in äöverlèk mit sjrievers en muzikante bekieke of de wanjeling ouch nog op ‘ne angere datum kan waere gehaoje. Berich dao äöver volgtj.

 

← Ga terug