Poëziewanjelinge in bookvórm

De aafgeloupe jaore, van 2015 – 2019 haet Veldeke Krink Ech eder jaor ’n poëziewanjeling op ’t programma gehadj in ’n sjoan ómgaeving bönne ’t werkgebied van de krink. Die activiteit woor vanaaf de ieëste kieër ’n succes. Óm dao op trök te kieke, geuftj de Krink noe ’n beukske oet mit ’n besjrieving van de wanjelinge: Lilbosch, Zöstere, Staeveswaert, Ech-centrum en de Nuujsjtadt. Mit foto’s en mit gedichte.

Eige aan de poëziewanjelinge woor det ónger ’t wanjele op bepaaldje puntje waerdje stilgestaon óm te loestere nao ’n gedich of kort verhaol, soms muzikaal omliesj. De sjrievers wore meis leje van de Sjrieverskring Midde-Limburg, womit VKE dökker bie activiteitet samewèrktj. En noe dus 5 jaor achterein väör de poëziewanjelinge. Det haet väöl nuuj gedichte of verhaole opgeleverdj. In ’t book van de 5 jaor poëziewanjelinge is ’n groat aantal aafgedröktj naeve of taege de achtergróndj van sjoan foto’s die van de wanjelinge zeen gemaaktj door Geert Janssen. Daomit is ’t book ’n herkènbaar bezit, hieël fijn óm te höbbe, in te kieke en in te laeze. Eventueel aan de hand d’rvan de wanjelinge (nog) éns te make. Mer ’t is ouch hieël gesjiktj óm cadeau te gaeve aan emes dae mit de streek of de betreffendje kerne get haet.

Aanvankelik zoe ’t book in mei zeen versjene. De óntwikkelinge mit ’t coronavirus en de daomit samehangendje maotregele höbbe de oetgave vertraogdj. Op zaoterdig 26 sept. a.s. óm 16.00 oer zal ’t noe geprissenteertj waere en daobie aangebaoje aan de wèthaojer van cultuur van de gemèndje Ech-Zöstere en aan de sjrievers. Leje van de Krink höbbe ’t book – 62 blz. in kluuer –  bie väörinsjrieving kènne bestèlle. Nao 26 september zal ’t op versjillendje adresse verkriegbaar zeen väör 12,50 euro. Informatie op de website van Veldeke Kring Echt