Prizzentatie Nachtegaal Deil 3 euver de poëzie vaan Wim Kuipers
Op goonsdag 8 mei aonstaond vint de prizzentatie plaots vaan ’t book Kalle mit kómkómmere. Bloemlezing uit de poëzie van Wim Kuipers. De prizzentatie begint um 14.30 oor in de krypte vaan ’t Sociaol Historisch Centrum Limburg, Sint Pieterstraot 7 in Mestreech. Naozit en borrel tot 17.00 oor. Sprekers zien Joep Leerssen en Ben van Melick, dao zien veurdrachte door oonder mie d’n diechter zelf en samespraok tösse Ine Sijben, Ben van Melick en Wim Kuipers. De beukskes zien dao ouch te koup veur € 14,95 en nao 8 mei in de bookhandel. Ouch kint geer ze nao deen daotum bestèlle bij Oetgeverij Leon van Dorp en bij ’t LGOG.
De Poëzie vaan Wim Kuipers
Kalle mit kómkókommere bevat ‘n inleiing vaan Joep Leerssen, de prozavertaoling en de commentare bij de blomlezing oet ‘t wèrk vaan Wim Kuipers zien vaan Ine Sijben en Ban van Melick.
Journalis en diechter-sjrijver Wim Kuipers (Neel 1939) publiceerde vaanaof 1979 poëzie in ‘t dialek vaan de streek boe heer opgreujde, experimenteel gediechte in dèks hallucinerende beelde, die getuige vaan ‘n intens beleving vaan netuur en boereland, ‘n oetböndeg fantasie en groet mètleve mèt ‘t lije vaan mins, bies en gewas. Meh ouch de gemankeerde moderne mins en d’n oonbegrepen diechter koume veer tege in zien gediechte, die bovenal ‘n lofzaank zien op de Limburgse taol.
Joep Leerssen waor hoeglieraar Europese Studies aon de Universiteit vaan Amsterdam en is allewijl es emeritus hoeglieraar ‘Limburg en Europa’ (Universiteit Mestreech) verboonde aon ‘t Sociaol Historisch Centrum veur Limburg.
Deil 3 vaan de Nachtegaalreeks
’t Book Kalle mit kómkómmere vörmp Deil 3 vaan de Nachtegaalreeks, ’n serie monografieje boe-in ederskier ‘ne Limburgstaolegen auteur of ’n thema oetveureg beleech weurt. Ieder versjene in dees serie Deil 1, mèt es titel “Den duvel van de middig goof ós vriej” euver de Remundsen diechter Paul van der Goor, gesjreve door Pim Thielen. Deil 2 hèt “Gekheid, mer neet boete de schraom” euver de carnavalsbuut in Limburg es literair versjijnsel, en is gesjreve door Guus Urlings.
Eder deil vaan de Nachtegaalreeks besteit oet ’n essay boe-in de achtergrun vaan de behandelden auteur of ’t behandelde thema weure touwgeliech én ’n blomlezing oet ’t oeuvre of ‘t thema. ’t Essay is in ’t Nederlands gestèld um d’n teks ouch begriepelek te hawwe veur lezers die ’t Limburgs neet mechteg zien. De blomlezing bevat tekste in d’n originele Limburgse taol mèt ’n vertaoling daan wel ’n touwliechting in ’t Nederlands. ’t Doel vaan de reeks is de diversiteit en kwaliteit vaan literatuur in ’t Limburgs veur e groeter publiek vaan lezers dudelek te make.
De Nachtegaalreeks slut aon bij ’t e paar jaor geleie versjene standaardwerk “Geschiedenis van de literatuur in Limburg”. Allewel de literatuur in ’t Limburgs structurelen aondach kraog, bleef ’t aondeil devaan relatief besjeie. De Nachtegaalreeks is ouch opgezat um in die lacuun te veurzien. De Nachtegaalreeks is ’n initiatief vaan Veldeke en LGOG en kaom tot stand mèt steun vaan de Raod veur ‘t Limburgs.
