Program vaan de Nach van ’t Limburgse Leed is bekind

’t Compleet program vaan de Nach van ’t Limburgse Leed 2018, die op 15 september aonstaonde zal plaotsvinde in Venlo, is bekind. Al prizzenteert de Nach miestal meziek vaanoet de ganse provincie, deze kier steit ’t program op ’t Hoofpodium op de merret in ’t teike vaan 675 jaor Venlo en heet ‘t ‘n gans groet-Venlose bezètting. Neve Tei & Marij en e bezunder optrejje mèt leedsjes oet de Venlose Revues is dao ’n reünie vaan Pinda Wullum. Wijer zien d’r verdeild euver allerlei locaties in de stad optrejjes vaan oonder mie Linke Mik, Ton Engels en John Coenen (vaan Taai Taai). ’t Getkske van Gelök weurt verzörg door Neutjesrang, de Luuster-nach arties vaan dit jaor is Joep van Wegberg. Heer trejt mèt zien Joep’s Kapel op bij De Witte. De priesoetreikinge vinde plaots in de Frans Boermanszaol in de Maospoort boe Veldeke Oeuvrepries-winner Gé Reinders ouch zien nui CD lanceert. Alle optrejjes zien gratis touwgaankelek.   

Aofwisseling

Dao is veur ederein get wèls bij dit dialekmeziekevenemint. De Nach begint al hiel vreug: ’s middags vint e beslote optrejje plaots vaan Thei & Marij veur de bewoeners vaan De Beerendonck. De Venlose rockformatie Waers trejt in de middagore op bij meziekwinkel Sounds. Speciaol is ouch ’t ope podium bij De Galerie, boe vaanaof 17.00 oor taletnvol acts zalle laote hure wat ze in hoes höbbe. Daoneve weurt de gansen daag de Venlose 100 live oetgezonde vaanoet De Locomotief, boe ouch gasartieste aonwezeg zalle zien.

’s Aovends bringk Rob Achten, oftewel JoeksDJ Rob, op ’t Hoofpodium op de merret es opwermerke alleriers ’t bèste oet 675 jaor dialekhits oet Groet Venlo. Boenao Orkesje Speult  Dialek vaan Wim Naus en Lottie Boermans ’n muzikaol reis door d’n tied maak door ’t bringe vaan leedsjes oet Venlose Revues. ’t Zangduo Thei & Marij besteit volgend jaor 3×11 jaor en dat zjubelei weurt op de Nach alvas ingelojd. Ouch zal d’r nog e kort verrassingsoptrejje op de merret plaotsvinde. En daan is dao ouch nog ’n reünie vaan Pinda Wullum, bekind vaan klassiekers wie Vader Stad en Late Nach.

Priesoetreikinge

In de Maospoort weure de Veldeke Oeuvrepries en de Jo Erenspries oetgereik en prizzenteert Gé Reinders zien nui CD. De kandidate veur de Jo Erenspries zien bekind. De acts die dit jaor kans make op ’t winne vaan de prestigieuze pries zien: Huub Holtman (Grubbenvorst), Harold K (Susteren), Jorn Lucassen (Schimmert) en Mella (Neer). De Nach geit door tot twie oor in de mörge. Kiek veur mie gedetailleerde informatie op de website vaan de Nach.

 

 

← Ga terug