Raod vaan Europa: Limburgs op alle nivo’s vaan ‘t oonderwies meugelek make

De Limbörgse Academie melt nao aonleiing vaan ‘t rapport vaan ‘t Comité vaan Experts vaan de Raod vaan Europa tot Nederland de taolrechte veur ‘t Limburgs in de wèt moot opnumme en Limburgs in ‘t oonderwies op alle nivo’s, ouch universitair, én in de media meugelek deent te make.

Dat en mie steit in ‘t pas gepubliceerd periodiek rapport euver de staot vaan ‘t Limburgs vaan ‘t Comité vaan Experts. ‘t Rapport beneump, mèt oongekinde direkheid, wie väöl tot Den Haag tekortsjut veur ‘t Limburgs. Geer kint de completen teks vaan ‘t expert-rapport hei bekieke. Dit rapport weurt doorgaaons integraol euvergenome door de Raod vaan Europa.

‘t Rapport herhaolt ouch tot Den Haag in permanent euverlègk moot trejje mèt de sprekers vaan ‘t Limburgs euver de besjerming vaan de taol. Daoneve geve de experts, veur d’n allerierste kier sinds de erkinning in 1997, ‘n oetzunderlek oetgebreide lies mèt aonwijzinge um ‘t Limburgs te besjerme. De Limbörgse Academie heet sinds 2019 veur Limburgse taolrechte en al dees punte in häör NGO rapportages gepleit.

Euverheid blijf in gebreke

De nationaol euverheid weurt wijer opgerope um ‘t gebruuk vaan ‘t Limburgs door de regionaole umroop, bewusweuring euver ‘t Limburgs en de Limburgse gesjiedenis en cultuur, Limburgstaolige plaotsnaomsjelder en ‘t gebruuk vaan de taol in ‘t economisch en sociaol leve te regele.

De Raod vaan Europa tik de Nederlandse euverheid op de vingers euver wiezier ze in gebreke blijf mèt betrèkking tot ‘t Limburgs. ‘t Is noe aon de nationaol en provinciaol euverhede én de Limburgse Ierste en Twiede Kamerlede um, zoewie dat ouch veur ‘t Fries gebäört, hei-op actie te oondernumme. Aldus de Limbörgse Academie.