Rectificatie Jaorbook nao e beriech oet Nui Zieland

Veer kriege neet ederen daag pos oet Nui Zieland meh noe dat zoe is geit ’t ouch nog um ’n correctie vaan get wat in ’t recent versjene Jaorbook vaan Veldeke steit. Lei Meisen (want dee woent allewijl in Nui Zieland) sjrijf us tot d’r ’n vreiseleke fout is gemaak in ’t artikele euver de verkierde spelling van wäörd wie um en un. Dao-in weurt naomelek op pagina 56/57 beweerd tot ’t beeldsje veur de winner vaan ’t OLS, d’n Um genaomp, bedach en gesjoonke is door Lei Meisen zelf. Meh Lei Meisen wèt wel beter. Heer sjrijf:

“De UM is hielemaol en gans allein de verdeenste van miene toenmalige collega Alf Poell (dae auch door de OLS federatie daoveur ongersjeijje is). Hae haet zich gerealiseierd dat de sjötters altied zagte: veer höbbe ‘m! Maar wat is dat dan, dat ‘m. Es zie nao t wenne van t OLS nao hoes koume, hawwe zie niks biej zich. D’r waor gein specifiek ereteike wie eine baeker of wat dan auch om – net es biej vööl sjporte – in de loch te sjtaeke es teike van de euverwinning.

Dao op doordenkend haet Alf de UM bedach, haet eine kunstenaer gezoch om t wiejjer oet te wirke (Teun Rozenboom oet Maarland) en haet dit idee veurgelag aan de OLS federatie. Wae t beeldje oeteindelik betaald haet weit ich neit, maar zoo is t gegange. In de sjötterswelt is dit juichend ontvange, noe koosjte de sjötters eindelik mit eine echte trofee nao hoes. De UM weurt noe door de wennende sjötterie t ganse seizoen mitgedraage biej eeder oettrejje en alle sjöttefeeste es teike van hun positie es OLS-wennaar.” 

Boevaan akte en bij dees rectificatie. Veer vaan Veldeke Limburg  beeje – in ’t bezunder naomens de sjrijver vaan ’t artikel Pierre Bakkes – aon Lei Meisen en veural Alf Poell eus excuis aon veur de vergissing.