Reg van Loo nuie veurzitter Veldeke Limburg

De Algemein Lede Vergadering vaan Veldeke Limburg heet op donderdag 12 mei 2022 Reg van Loo bij acclamatie gekoze es häöre nuie veurzitter. Heer volg daomèt Christine van Basten op die nao 4 jaor de veurzittershamer euverdroog.

Reg van Loo kump oet Eys (Ees) en dat ligk op de grens tösse boe ripuarisch Limburgs gesproke weurt, zoe wie in Vaols en Kèrkraoj, en ’t Limburgs vaan ’t Heuvelland. Zoe heet heer nao eige zègke van allebei de dialekte in zien spraok get mètgekrege. Reg is nao ’n carrière in ’t oonderwies, deils es docent deils es bestuurder, jaorelaank börgemeister vaan de gemeinte Vaols gewees. Daoneve is heer actief in versjèllende cultureel instèllinge in Limburg. In zien touwspraok tot de vergadering benaodrökde heer tot ’n belaankriek is tot Veldeke aondach blijf besteie aon de bevordering vaan ’t Limburgs oonder de jäög, want zoonder die heet eus regionaol taol geinen touwkoms.

Christine van Basten naom tijdens de zelfde vergadering aofsjeid vaan bestuur en kring vaan Veldeke. Zie heet ziech es veurzitter oonder mie bezunder verdeenstelek gemaak in ’t op de kaart zètte vaan eus vereineging bij de provinciaol polletiek, bij ‘t formulere vaan ‘n helder missie en visie en in ’t structurere en professionalisere vaan de intern organisatie. Vice veurzitter Lei Heijenrath bedaank häör naomens de lede en de kring veur de plezerege meneer boe-op zie ziech heet ingezat veur de Limburgse taol en veur Veldeke es vereineging. Binnekort kint geer op deze website ’n oetgebreid interview leze mèt de nuie en d’n awwe veurzitter vaan Veldeke.

Foto’s Emily Brounts

← Ga terug