Reundje lángs Veldeke: bezuūk án de Kring Venroj

Vurzitter en Sikkertaris Veldeke Limburg op bezuuk beej Veldeke Kring Venroj.

6 nòvvember 2018 was vur òs enne richtege Veldeke dág! Smaerges ‘n ántal loeëpende zake durgesproke waoroonder de ALV die òp 15 nòvvember göt plátsviende. Smiddegs òp waerkbezuūk beej Veldeke beschaermhieër gouverneur Theo Bovens, waor weej allerlejse bestuūrleke zake mit  besproke, már den òs ok nog ‘s áttendieërde òp de tentoeënstelling 1000 jaor Alden Biesen ien verbând mit ‘t ònderdieël ovver Hendrik van Veldeke en òp de website ovver 75 jaor bevrejding en de subsidiemeugelekheeje van de Preveens Limburg. Ennen beschaermhieër den richtig mit Veldeke mitdaenkt!

En dan ‘t aovendpregrám, ‘n kennesmakingsbezuūk mit ‘t bestuūr van Veldeke Venroj: dat was echt de perfekten áfsluter. Naodat weej ráp ‘n smakelek vörkske hán geprikt beej kefee de Uitmarkt (www.uitmarktvenray.nl), gelaege án de práchtige en al ien kerstsfere verkieërende mernt ien Venroj, ginge we metieën dur nor de bure: Gastrobar TOF (www.gastrobartof.nl) waor weej wiēre òntvánge dur ‘t voltallege bestuūr van de Venrodse Kring.

Colien Jacobs is sindert 8-9 jaor vurzitter en hit de liefde vur ‘t Venrods mit de páplepel iengegote gekrege. Zeej geniet van dialekt, iederen dág. Ok de “herkenbaarhejd” vur de âldere ginnerasie viendt zeej belángriek. Dorrum “vaechte weej ok vur ‘t Veldeke en ‘n kònstânt leejeántal, már ‘t göt nie van aeges”. Frits Basten (goeje naam trowwes 😉) is vicevurzitter en spitst zien aege toew òp de “Venrodsen Aovend”, de drukst bezòchte áktivitejt van de Kring.’r  Werre veul ártieste uut ‘t Venrodse beej betrokke en den aovend trekt iedere kieër (20 nòvvember vur de 29ste kieër!) ruum 300 bezukers. Kòmplemente! Ok ánwezeg zien Lei Potten (caentefoekser en goēd bekend mit Venrodse historie en verieëneginge), Mariel van den Munckhof (sikkertaris en zörgt ò.â. vur de jaorlekse uutgaaf van d’n Hazegaerf, ‘t tiedschrift vur volkskultuūr van Veldeke Venroj), Henk Arts (scriptor en mit-auteur van’t Broonsgruūn buukske, edisie Venrodse streektaal), Marij Voermans (verzörgt ò.â. ien de naozòmmer ien ovverleg mit d’n deke en vreejwillegers van de Groeëte Kaerk de Dialektmis, die bovvendien ok wert uutgezoonde òp Omroep Venray) en Jacqueline van den Heuvel.

Jacqueline geft án (mit pien ien ‘t hárt) te gón stòppe mit ur bestuūrslidmaotscháp, már dat ‘t nao 18 jaor tied is um ‘t stökske án jòngere aover te drage. Mariel geft án dat zeej ur aege zörge mekt ovver de toekòmst van’t dialekt en dat verneejing ien daenke en doēn hárd nuuëdeg is. Ter verdudeleking vertelt zeej ovver ‘t sukses van ‘t Facebook-projekt “Venrods òp vreejdág”. Iedere vreejdág plátst zeej sindert aenkele mónd ‘n plaatje mit gesproke woord en zin ien MP4 format, òp de Facebook pagina van Veldeke Venroj (@VeldekeVenroj). ‘t Ántal volgers van de pagina is van dat mement áf fleenk umhoeëg gegaon; ‘r is dus zeker belángstelling vur ‘t Limburgse dialekt már weej mòtte ‘t ok òp de juuste wiēs “ovver de buun” brenge.

Veldeke Venroj is ‘n verieëneging die ur aege ten doel stelt um de belángstelling vur de Venrodse taal en kultuurgeschiedenis laevend te hâlde en duut dit òp kráchtege en durtastende wiēs vanuut ‘n vâst kader cq. stramien. Zoeë viendt elke mónd ‘n áktivitejt pláts en duut ‘t bestuūr aeges bekând alle waerk. Ok ‘t orginnesieëre van jaorlekse áktivitejte en uutgaves (beejvurbeeld ‘t “Venrods woordeboēk”, ‘n verkorte versie dorvan: ‘t “Broonsgruūn Buukske” en ‘t “Venrays spraekwoordeboēk”). Ândere vurbeelde zien laezinge en ekskurzies, enne Venrodsen aovend, ennen aetaovend en enne kurzes “Venrods laeze en schriēve”.

Vur dizze laeste kurzes, den de Kring jaoreláng as serie van 10 waeke van 1 aovend per waek  verzörgde, nimt de animo áf. ‘t Format is schiens minder ienteressânt en ok de maester rákt òp laeftied. Mit de vurzitter van de Kring Venlo, Henk Buskes, is ‘t bestuūr dan ok ien kònklaaf ovver ennen ânderen ánpák. ‘r Is bewustzien dat dit nuuëdeg is en dees Kring wet van ánpákke. Már zillie zien sillektief mit priēs uutdaele en dat is már goēd ok, want dan blieft ‘t eksklezief. En as, dan ok goēd: Mit innege regelmaot rejkt Veldeke Venroj d’n Âld Venrodsen Ieërepries uut. Dizze pries wert uutgerejkt án meense die eur aege uutzonderlek verdienstelek hebbe gemákt vur de Venrodse kultuur en taal.

Ok is Veldeke Venroj lid van ‘t Historisch Platform Venray en mekt daordur dieël uut van de website van RooyNet, ‘t digitaal geheuge van de gemaente Venroj. Òp RooyNet stón kultuur-historiese fotoos, films, gelöjde en dòkkemente. Dees zien dur de dieëlnemende orginnezasies verzameld, gedigitalisieërd en via RooyNet toegánkelek gemákt vur ‘n groeët pebliek. ‘t Gemaentelek genealogies árchief en ‘t digitale árchief vanáf 1880 van ‘t Venrods waekblad Pieël en Maas zien, òp ‘n paar jaorgánge nao, òp RooyNet te viende.

Weej ware ònder d’n iendruk. Van de ienzet, openhejd en ‘t ânthoezjasme van dit bestuūr. En nao ‘n korte fotosessie òp de mit kerstverlichting versierde mernt, reeje weej muuj már voldaon terug nor ‘t Zuuje.

Veldeke Venroj, weej zien d’r ok gröts òp!

Christine van Basten-Boddin en Ron de Louw
Vurzitter en Sikkertaris Veldeke Limburg

← Ga terug