Rundje langs Veldeke: Op bezeuk beej Veldeke Venlo.

Veurzitter Christine van Basten en sikkertaris Ron de Louw bezeuke lokaal Veldeke Kring

Op ‘ne werme dónderdaagaovend in Juni woorte weej door ’t bestuur van Veldeke Venlo hertelik óntvange in Cafe De Gaaspiep aan de Kleine Kerkstraot in Venlo. Ein gezellig café wao de krink mit regelmaot beejein kump en wao euveral kiepse, hudjes en andere zake um d’n bums te versiere ligge en hange.

Det de Krink Venlo mit 190 leje en 150 donateurs, ónder  de bezielende leiding van veurzitter Henk Buskes, gezeen maag waere als ‘ne gezónde tak van de boum dae Veldeke hit; wiste weej al. Aevel, det zeej naeve ‘n lekkere tas kóffie mit flaaj, ein knappe prissentatie oet d’n hoeëge hood toverde; dao veur verdene zeej ‘ne pluum op eure Veldeke hood.

Waat doon weej zoeë allemaol

Henk en Henk, Martin, Bas, Diana, Wilma en de twieë Wiele nome ós mit in eur verhaol “waat doon weej zoeë allemaol”. Noow, ‘ne hiele houp, weej neume inkele veurbeelde: Jurering van de Faatse in de vastelaovesoptochte van Venlo en Blierick, de declamatiewedstried in Venlo,Blierick en Tegele, de cursus Venloos laeze en schrieve, de oetreiking van de oeuvrepries Limburgs leed, de organisatie van de jaorlikse vreejwilligersdaag en de slumste Venlonaer, de veurstelling opwaeg nao Kersmis en de redactieveuring en productie van dreej edities per jaor van de Kroedwis. Ouk de website van Venlo is ein A in orde en zelfs veurzeen van ‘t online Venloos Waordebook.

Plezeer hebbe mit taal

Nao de prissentatie woort de kóffie umgetoes veur ’n dröpke en waas d’r tieëd veur ’n oetgebreide gedachtewisseling euver ’t werk van de vereiniging en de toekóms van ’t Limburgs. Waat indrök haet gemak is det de Krink Venlo ech van d’n hood en de rand wet. Minse laote schittere, plezeer hebbe mit taal em mit zichzelf ónderein, maar veural de wins um kinnis en kunde te deile mit andere kringe steit in Venlo veurop.

’t Meugelik make van beejeinkómste, de kinnisverbreiding en deiling binne Veldeke wuurt  as  ’n wiechtige opgaaf gezeen veur ’t bestuur van Veldeke Limburg. Taeves woort ’n werme oproop gehalde veur ’t behald en de versterking van ’t weiteschappelik ónderzeuk, ’t wuurt tied det de bestaonde deiltieëd lierstool Taalcultuur in Limburg aan de Uninversiteit van Meestreech flot wuurt umgezatte in ’n reguliere volle formatieplaats. Dao is ’n duchtige investering op zien plaats in de discussie euver de toekóms van ’t Limburgse Streektaal beleid.

Samewerking mit ónderwiesinstellinge

Ouk deent de samewerking mit andere ónderwiesinstellinge in ’t Limburgse gezóch en geïntensiveerd te waere, dit um ónderzeuk nao en ónderwies op ’t terrein van de lokale Limburgse dialekte te stimulere en te verbaetere. ’n Andere constatering, door de Krink aan ós mit gegaeve, waas det d’r vuuel speulers zien op de Venlose mert van ’t Limburgs dialek, waodoor ónder andere de basisschoeële en andere publieke partieë door de buim ’t bós neet meer zeen en dan ’t kaf neet van ’t Veldeke kaore weite te scheije.

Nao ’n letste drenkske en ’t make van ’n geveulige plaat, vertrokke weej weer nao ’t zuje. Geïnspireerd door de minse van Veldeke Venlo en weer waat Veldeke wiezer.

Nóg ‘ne kier danke  en chapeau,

Christine van Basten-Boddin en Ron de Louw
Veurzitter en sikkertaris Veldeke Limburg
Juni 2018.

 

← Ga terug