Rundje langs Veldeke: op bezeuk bie de Krink Ech.

Veurzitter Christine van Basten en secretaris Ron de Louw bezeuke lokaal Veldeke Kringe

Op goonsdigaovendj 13 juni wore weer te gas in ‘t nès van de Limburgse dialectkampioene. Bie de Limburgse finale van de Veldeke Declamatie wedstried op 26 mei in Panningen wore dit jaor weer 2 deilnummers oet de krink Ech op de 1e plaats geëindigdj en daomit Limburgs kampioen. Eine daag väör oos bezeuk wuntj Henk Hover oet Ech ‘t Groat Limburgs Dictee van Veldeke Limburg en De Limburger. Weer ‘ne kampioen d’rbie. De taal van Ech, Pej, de taal van ‘t Hènge, wo Henk vanaaf kömptj, mer eigelik alle dialecte, zeen Kampioen Henk op ‘t lief gesjreve en vloeje oet zien pen.

Leefde väör de Limburgse taal

Mer det geltj zeker ouch väör ‘t 7-koppige bestuur van de Krink Ech mit Ton van Wegberg es väörzitter aan ‘t roer. Jaomer det secretaris Miel Coenemans, dae zich enorm haw ingespanne om dit bezeuk in gooj bane te leië – en woväör dank – d’r neet bie kós zeen en det bestuurslid Rinus Mulders op vakantie woor. De aanwezige bestuursleje Ton,Theo, Piet, Anke en Yvonne lete zich van hunne bèste kantj zeen en bönne angerhalf oer kome ‘n groat aantal thema’s langs. En bönne die angerhalf oer kóste weer gewaar waere det dit bestuur väöl leefdje haet väör de Limburgse taal, mer daobie ‘ne gooje kiek haet op de realiteit van de daag van vandaag. Zie sloete de ouge neet väör allerlei oetdaginge wo zie väör kómme te staon, benutte de kanse die d’r zeen en staeke de henj stevig oet de moewe.

Väör de twieëdje hèlf van ‘t jaor staon d’r nog hieël get activiteite oppe agenda, zoawie: in juli: ‘t jaorliks oetstepke (dit jaor nao Leuve) in augustus: ‘n poëziewanjeling in Ech-centrum in september: ‘n dialectmès bie de kepel van Sjaelberg, ‘ne Toon Hermans aovendj in Ech en ‘n wanjeling en teves excursie in de loup van de Middelsgraaf, die opnuuj is ingerich. In oktoaber: is d’r ‘ne film- en meziekaovendj geplandj in november: ‘n laezing äöver Limburgse dialecte en waat dao allemaol mit same hungtj in december: ‘n nuuj oetgave van ’t Veld(j)eke bekèt en ‘ne fieësaovendj in de kerssfeer. Get väör ederein dus!

Actieve krink mit väöl versjillende activiteite

Ton v. Wegberg: De Krink Ech haet óp ‘t ougeblik  250 leje, die väör ‘t grótste gedeilte bestaon oet 60-plussers. ‘t Aantal sjómmeltj waal ‘n bietje per jaor, mer ‘n belangriek aandachspuntj väör ‘t bestuur is toch de “vergriezing.” Weer zeen ‘ne actieve krink mit väöl versjillendje activiteite. Gemiddeldj 50 tót 70 leje zeen in wisselendje samestèlling aanwezig per activiteit mer weer constateerdje ouch det zó’n 100 leje noatj kome. Oet verder óngerzeuk is gebleke det hieël väöl leje ‘t bès belangriek vènje waat Veldeke duitj, merze höbbe neet direk behoefte óm aan de diverse activiteite deil te numme. Eigelik zeen ‘t “donateurs.”

De beheerder van de cente Theo Bougie geuftj ‘n toelichting op de financiële positie van de krink. Die is, door väorzichtig en doordach beleid, zeer solide te neume. Waal stèltj Theo de hieële structuur van de vereiniging aan de orde en haoptj det ‘t Provinciaal bestuur dao werk van geitj make, om deze, mit ‘t oug op ‘t wirkbaar haoje van de leje-administratie en de verplichtinge n.a.v. de versjerpte privacy wetgaeving, opnuuj in kaart te brènge en statutair te verbaetere.’t Ieëste hoeswerk is bönne.

Bestuur: opvolgers gezóch

‘t Lejebestandj is redelik cónstant, aevel ‘t vènje van bestuursleje is ouch hie ‘n hieël oetdaging. Zoa weurtj al duchtig gezóch nao ‘ne opvolger väör Miel. Vanoet de leje kömptj weinig reactie op dees probleme. Ze zeen det toch mieë es ‘n functie van ‘t bestuur zelf. En, det mót gezag, ‘t bestuur paktj det mit verve op. Yvonne Smeets völtj aan door oet te lègke waat ‘t bestuur óngernumtj óm ‘t tij te kieëre. Zoa zeen d’r twieë bieeinkómste georganiseerdj mit ‘ne klankbordgroep van “jóngere” mit de centrale vraog: “Wie kiktj geer hie taege aan?” Dao kome allerlei suggesties oet, zoawie ‘t aanpasse van meziekprogramma’s en de vaste vereinigingsaovend(de goonsdigaovendj).Ouch ‘t organisere van alternatieve activiteite zoawie ‘n kaokclub, die zich bezig zal haoje mit de recepte oet ‘t kaokbook.

Kortóm: minse enthousiast make väör Veldeke en ouch èns activiteite organisere väör minse die nog gein lid zeen. Ouch de tip van de krink Zitterd weurtj mit genómme: “Es se ‘t bestuur wils verjónge doog det door ‘n paar jóngere tegeliek op te numme.” ‘t Zittendje bestuur zal ‘ne ómslaag mótte make en bereid mótte zeen anger saort activiteite te organisere.

Deskundigheidsbevordering

Piet Aben,  in 1999 (!) bie ‘t bestuur gekómme, numtj ‘t waord. Spraeke, laeze en ‘t sjrieve van ‘t dialect is ‘n compleet pakket en det verdeentj aandach in de volle brèdje. Piet hèltj ‘n stevig pleidooi väör de deskundigheidsbevordering van ‘t bestuur en mesjien ouch ‘n aantal leje en hae haoltj de einjaorige HBO- cursus ( red. de zgn. Lieërgank Limburgs)  nao väöre dae oatj is aangebaoje door Veldeke Limburg ter verdeping van de kènnis van oos dialect. ‘t Óntbraeke van dae cursus- of get vergeliekbaars- wobie in verkorte vórm historische, linguïstische, sociolinguïstische en literaire achtergrunj van ‘t Limburgs aan bod kómme, weurtj ech es ‘n groat gemis ervare bie ‘t bestuur.

Óndanks det de leje van ‘t bestuur väölal hun ankers hawwe in ‘t óngerwies, veule ze zich ónvoldoende toegerösj óm ‘t taalkundig aspect op niveau oet te drage aan de leje of derde.’n Dudelik appèl aan ós( laes: ‘t provinciaal bestuur van Veldeke) óm d’r get mit te doon. Weer zitte ‘t op de agenda.

Hofleverancier van alles waat mit streektaal te make haet

Veldeke weurtj bönne dees regio ech gezeen es hofleverancier van alles waat mit oos streektaal te make haet. ‘n Sjoan väörbeeldj is, det de vastelaovesvereniginge zich inmiddels haoje aan de “Veldeke spelling 2003.” “’t Haet get tied en meute gekosj,mer oeteindelik is ‘t toch gelöktj.” ‘t Bestuur is ouch mit rech trots op hun oetgave mit name ‘t Kwartaalblaad “Veld(j)eke bekèt” en “’t Brónsgreun beukske Ech Zöstere” det qua opzat te vergelieke is mit ‘t väörig jaor versjene book: “ Ós Moddersjpraoch” van de Krink Um Mamelis.

De gemèndje Ech-Zöstere haet bie de oetgave destieds zelfs 500 exemplare ingekoch es welkomsgesjenk väör nuuj inwoners. Anke Heythuysen verzörgtj de declamatiewedsrieje väör de sjoale. Äöver de wieze wo-op m’n dit lokaal aanpaktj kalle w’r nog effe door. Es “toetje” kriege w’r ‘t prachtige beukske:” 10 Jaor declamatiewedstried veur de jeug van de basissjoale in Groat-Zöstere” aangebaoje.

Weer kènne nog oere kalle mit deze  enthousiaste club, mer op ènnig moment móste weer toch weer trök nao Buchte en Baek. ‘t Woor ‘n hertelik en informatief samezeen, woväör väöl dank.

Christine van Basten-Boddin väörzitter Veldeke Limburg.
Ron de Louw secretaris Veldeke Limburg.
Juni 2018.

← Ga terug