Shortlist Sjiek Literatuurpries bekind
Es oonderdeil van Festival Sjiek, wat op 27 jannewarie aonstaonde weurt gehawwe in de ECI Cultuurfebrik in Remund, is ouch de Sjiek Literatuurpries ingestèld. ’t Taol- en Lèttere Platform vaan de provincie Limburg, wat ’t festival organiseert, is vaan meining tot de riekdom vaan de twietaolegheid vaan Limburg ’t bèste kint weure getoend in zien twietaolege literatuur. Daorum waor dao verleie jaor ‘ne literatuurpries veur ’t bèste Nederlandstaoleg literair fictiewèrk mèt Limburg es thema of achtegroond. De Sjiek Literatuurpries geit dit jaor daorum nao ’n in ’t Limburgs gesjreve fictiebook. De jury bestaonde oet ex-streektaolfunctionaris Pierre Bakkes en cultuurredactrice Jolien Linssen vaan L1 höbbe 13 ingesjikde wèrke mote beoordeile.
Drei wèrke zien genomineerd en vörme de short list boe-oet de winner gekoze weurt. Nao ’t lèste juryberaod zal d’n oeteindeleke winner weure bepaold. De genomineerde zien: Lizette Colaris mèt ‘Mo’, ‘ne ‘Zittesje thriller’. Annie Tummers-Huppertz mèt häöre poëzieboondel in ’t Kèrkraojs ‘Ing mangel zonnestroale’ en Wim Heijmans mèt ziene verhaole- en poëzieboondel ‘D’r jank van de tsiet’, ouch in ’t Kèrkraojs.
Lizette Colaris
‘Mo’ geit euver de minseleke verhawdinge, geweld en seks. ’t Is geine VVV-gids en geit neet euver bestaonde figure. ’t Is puur fictie mèt Sittardse eleminte en spannend tot de lèste lètter. Lizette Colaris stoont versjèllende kiere in de Platbook-serie en leus regelmaoteg veur tijdens dialekmanifestaties. Ouch bij Plat-eweg vaan L1 heet zie regelmaoteg ‘ne column. Vaan häör book maakde zie ouch ’n Nederlandstaolege versie én e luusterbook.
Annie Tummers-Huppertz
Annie Tummers-Huppertz sjrijf mesjiens wel ’t mies traditioneel: ‘Ing mangel zonnestroale’ bevat gediechte in strakke vörm, bekans altied op rijm, euver alledaogse dinger, zègk mer de details vaan ’t leve en dao-oet bliek tot ze hiel positief in ’t leve steit. Ze is lid vaan de dialekvereineging Kirchräödsjer Plat, leus regelmaoteg veur op dialekaovende. Ouch zie heet al versjeie kiere in de serie Platbook gepubliceerd.
Wim Heijmans
Wim Heijmans book ‘D’r jank van de tsiet’ is ‘ne hybride roman. Proza weurt aofgewisseld mèt poëzie. Heer deit dat in ‘ne gans eige stijl. Melancholie weurt aofgewisseld mèt humor, fantasie mèt realiteit, opgewekheid mèt dreuvegheid. ‘D’r jank van de tsiet’ versjeen in de LiLiLi reeks. Wim Heijmans publiceert väöl en regelmaoteg op zienen eige website, is hiel actief op Facebook mèt gefèlmde veurgedrage gediechte. Heer wón ieder twie kier de Veldeke Literatuurpries.
De Sjiek Literatuurpries 2019 weurt op 27 januari aonstaonde tijdens ’t Festival Sjiek bekind gemaak in de ECIO Cultuurfebrik in Remund. Veur ’t compleet program kint geer kieke op de website vaan ’t festival.