Sjrijf mèt aon Platbook 20: Det sjmaak nao mieër
Oproop aon Limburgstaolege sjrijvers um hun werk in te sjikke
Binnekort kump de 20ste editie vaan Platbook oet, ’n verzameling vaan Limburgstaolege poëzie en proza. Ederein dee Limburgs sjrijf kint zien tekste of gediechte insjikke. Zjus wie de veurege kiere heet ouch dit Platbook weer ’n eige thema en ‘nen eige redacteur. ’t Thema is deze kier “Det sjmaak nao mieër” en dat maag me hiel breid opvatte; ’t hoof dus ech neet allein euver ete of drinke te goon. Kuns, ‘nen ierste puun, e nui oontdèk land, de oonderwerpe ligke veur ’t oprape.
Limburgstaolege sjrijvers kinne tot 17 september eige werk insjikke veur Platbook 20. Dat kinne beveurbeeld gediechte, verhaole of columns zien. De bijdrage maag neet mie es 600 wäörd bevatte en kint aongelieverd weure bij oetgeverij TIC, d’n oetgever vaan Platbook, via paul@uitgeverijtic.nl . Sjrijvers boevaan ’t werk weurt geselecteerd oontvaange ’n oetnudeging veur de bookprizzentatie en e gratis exemplaar vaan Platbook 20.
Euver Platbook
Platbook is ’n serie dialekbeukskes veur Limburgstaolege sjrijvers en lezers. Auteurs oet de ganse provincie wèrke mèt um ederskier weer ’n opvallend thema te besjrieve. Veur eder editie maak ’nen andere, bij ’t thema passenden redacteur ’n selectie oet de tekste en sjrijf ’t veurwoord. Platbook weurt oetgegeve in opdrach vaan ’t Hoes veur de Kunste Limburg en kump tot stand in samewèrking mèt Veldeke Limburg, de Raod veur ’t Limburgs, de Stiechting LiLiLi, Oetgeverij TIC en Wim Kuipers (de bedinker vaan ’t Platbook-konsep).
De redacteur
De nuie redacteur vaan Platbook 20 is Roland Colee. Heer is aofkomsteg oet Born en journalis bij De Limburger. Heer is ‘ne vurege veurstaonder vaan eus Limburgse taol en de Limburgse volkscultuur. En heer is ‘ne fervente vastelaovendsvierder, dee zelf ouch leedsjes daoveur sjrijf.
Kiek veur mie informatie euver Platbook op www.hklimburg.nl/platbook of www.uitgeverijtic.nl . Platbook is veur € 9,90 te koup in de webshop vaan oetgeverij TIC (www.ticshop.nl) en in de betere bookhandel in Limburg.