Speciaol oetgaof vaan Platbook veur Mestreechtenere

In ’t kader vaan ‘t 40-jaoreg zjubelei vaan de Veldeke Krink Mestreech heet de serie Platbook einmaoleg ’n bezunder oetgaof op stapel stoon: editie nómmer 24 vaan de serie is einmaoleg speciaol bedoeld veur sjrijvers vaan de Mestreechter taol.

Dus: sjrijf geer wel ins get in ’t Mestreechs? E vertèlselke of e veerske, e gediech of e leedsje of ’n ech verhaol? En zouwt geer ‘t leuk vinde es eur sjrijfsel weurt oetgegeve?

Veldeke Krink Mestreech beejt uuch dit jaor de meugelekheid. Speciaol vaanwege eus zjubilei geve v’r eus eige Platbook oet mèt sjrijfsels in ’t Mestreechs. Daot mèt aon euze sjriefwedstrijd en sjik euren teks véúr 1 september in nao d’n oetgever paul@uitgeverijtic.nl.

Thema: Boonte störm

Dao zien e paar speulregels:

• ’t thema is “boonte störm” (en dat maag geer breid opvatte…, ’t hoof dus neet per se euver vastelaovend te goon).
• e verhaol maag maximaol 600 wäörd höbbe
• e gediech maag maximaol 45 regels höbbe.

Dao weure 35 tot 40 inzendinge oetgezeuk door ’nen oonaofhaankeleke redacteur vaan de Platbook-organisatie. Platbook 24 weurt geprizzenteerd op de jaorvergadering vaan de Veleke Krink Mestreech op 25 miert 2020.

Euver Platbook

Platbook is ’n serie dialekbeukskes veur Limburgstaolege sjrijvers en lezers. Auteurs oet de ganse provincie wèrke mèt um ederskier weer ’n opvallend thema te besjrieve. Veur eder editie maak ’nen andere, bij ’t thema passenden redacteur, ’n selectie oet de tekste en sjrijf ’t veurwoord. Platbook weurt oetgegeve in opdrach vaan ’t Hoes veur de Kunste Limburg en kump tot stand in samewèrking mèt Veldeke Limburg, de Raod veur ’t Limburgs, de Stiechting LiLiLi, Oetgeverij TIC en Wim Kuipers (de bedinker vaan ’t Platbook-konsep). Veur mie informatie euver Platbook bel mèt Oetgeverij TIC, 043-3262414 of kiek op www.uitgeverijtic.nl.