Stimuleringsfóns

De aofgeloupe maonde is drök euverlègk gewees tösse ’t Povinciaol bestuur vaan Veldeke Limburg en de besture vaan de lokaal Veldeke kring. Aonleiing waor de gaank vaan zake in ’t Zjubeleijaor 2016, wie Veldeke es vereineging 90 jaor bestoont. ’t Provinciaol Bestuur is toen volgens de mieste kring get erg enthousias gewees mèt ’t organisere vaan alderhand festiviteite boe de kring geine weet vaan hadde. Oonderwijl woort wel vaan de kring verwach tot zie hun bijdraog zouwe lievere. Dat woort ‘t Provinciaol Bestuur neet altied in daank aofgenome. Vaandao tot lede vaan ’t Provinciaol bestuur op bezeuk zien gewees bij de lokaal kring um beter aof te stumme wie de samewèrking in de touwkoms gestalte zouw mote kriege.

Faciliterend optrejje

Oetgaankspunt daobij is, tot ’t Provinciaol bestuur ziech nao de kring touw veural faciliterend geit opstèlle, wat wèlt zègke: neet mie zelf vaan alles organisere meh veural deveur zörge tot de kring hun eige activiteite kinne oetveure. En es ’t Provinciaol Bestuur zelf al get wèlt organisere, daan zal ’t dat doen in oetdrökkeleke samespraok mèt de kring. Dat steit wijer los vaan andere belaankrieke take vaan ’t Provinciaol Bestuur zoe wie ’t reprizzentere vaan de  vereineging nao boete touw, nao de media, nao de polletiek, nao ander vereineginge. En ouch ’t informere vaan de leden euver boe Veldeke veur steit en boe ’t mèt bezeg is blijf ‘n hooftaak vaan ’t Provinciaol Bestuur.

Stimuleringsfóns

Um dat facilitere vaan de kring concreet te make, heet ’t Provinciaol Bestuur e stimuleringsfóns in ’t leve gerope. In dat fónds zit e budget boe-op de lokaal kring e beroop kinne doen es zie get wèlle organisere boe ze zelf gein of te wieneg cent veur höbbe. Daobij is wel gestèld tot ’t leefs um activiteite moot goon die Veldeke es vereineging veuroet helpe, dus leefs nui activiteite die beveurbeeld geriech zien op ’t werve vaan nui lede of op ’t betrèkke vaan doelgróppe boe Veldeke tot noe touw wieneg aonhaank heet, wie de jäög.

Oondertösse zien al twie aonvraoge vaan kring veur ’t stimuleringsfóns gehonoreerd: de krink Ech heet ’n bijdraog oontvaange veur ’t viere vaan zien zjubelei en de krink Mestreech heet ’n bijdraog gehad veur ’t organisere vaan ‘ne middag mèt aw Mestreechse späölselkes veur de jäög. Dus wee ideeë heet um ins get nuis of get bezunders te organisere veur Veldeke: sprèk eur lokaal bestuur drop aon tot ze gebruuk kinne make vaan ’t Stimuleringsfóns vaan Veldeke Limburg.