‘t Groet Mestreechs Dictee

’t Centre Céramique opent op zoondag 28 aprèl um 10.30 oor häör deure. Um 11 oor deen daag geit de 16e editie vaan ’t Groet Mestreechs Dictee, georganiseerd door de Veldeke Krink Mestreech vaan start. Ederein kint gratis deilnumme, zoewel individueel of es gróp vaan minimaol 3 persoene (femilie, vrun, collega’s). De winner krijg e pläötske in de ieregalerij vaan ’t dictee. Zjus wie ander jaore is d’r ouch de meugelekheid um ‘veur spek en boene’ mèt te doen. ’n Perfekte oefening um ’t gesjreve Mestreechs te liere. Dees deilnummers kinne aon ’t dictee mètdoen en mage nao aofloup hun dictee zelf corrigere.

Sjrijver: Cécile Narinx

De in Mestreech gebore en getoge Cécile Narinx is dit jaor de sjrijver vaan ’t Groet Mestreechs Dictee. Narinx is mode-hoofredacteur bij de Volkskrant en is dus gewend um in de pen te klumme. Wijer waor ze in 2016 deilnummer aon ’t tv-program “Wee is de Mol?” en waor ze hoofredacteur vaan versjèllende modeblaajer. Tot ze Mestreechse is dat wèlt ze wete en ze bezeuk häör geboortestad gere um häör moojerstaol te spreke. Cécile zal dan ouch zelf aonwezeg zien um ’t dictee veur te leze.

Intermezzo: Batteraof

Tösse ’t luustere en sjrieve kinne de deilnummers aon ’t dictee in de poos oontspanne en weure ze getracteerd op ’n optrejje vaan Batteraof, ’n alter ego vaan muzikant Mitchel Ritchi (28). Mèt doezende volgers op Facebook is deze jonge muzikant oetgegreujd tot ’n Mestreechse bekindheid. Batteraof zal de deilnummers ammezere mèt eige gesjreve Mestreechse tekste op bestaonde leedsjes.

Veurbereiing

Es veurbereiing op ’t Groet Mestreechs Dictee kinne deilnummers www.mestreechtertaol.nl raodplege meh ouch de Facebook pagina vaan de Veldeke Krink Mestreech volge. In d’n aonloup nao ’t dictee weure hei-op wekeleks taolfèlmkes geplaots mèt einvoudege tips.

Insrieve veur ‘r Groet Mestreechs Dictee kint via www.mestreechsdictee.nl