‘t Limburgs door Den Haag officieel erkind es streektaol
Geer höb ’t euveral kinne leze: de minister vaan Binnelandse Zake Ollongren heet aongekóndeg tot ’t Limburgs officieel erkind weurt es streektaol . ’t Provinciebestuur had al ieder gepleit veur die erkinning. Nao de Europese erkinning die ’t Limburgs al in 1997 moch notere, zien veer noe ouch in Den Haag zoe wied.
De minister melt tot nao de zomer e convenant weurt geslote boe-in aofspraoke zalle weure gemaak euver wie riek en provincie same kinne wèrke aon ’t bevordere en behawwe vaan de Limburgse taol. Wat dat zjus inhèlt moot nog blieke want in ’t convenant wat ’t riek ieder euver ’t Nedersaksisch heet geslote, steit oetdrökkelek tot dat neet beteikent tot noe ouch extra cent weure vrijgemaak veur die taol.
Député Ger Koopmans toent ziech wie daan ouch verhäög mèt de Haagse erkinning. Tot ’t Limburgs weurt gezeen es ’n officieel streektaol is volgens häöm ouch belaankriek veur de twietaolegheid in ’t oonderwies. Heer wèlt in eder geval de Limburgse gemeinte en Limburgse cultureel organisaties, boe-oonder Veldeke, betrèkke bij ’t aof te slete convenant.
’t Kint bepaold gei koed tot me ouch in Den Haag ’t Limburgs noe es ’n echte taol zuut. Veural es veer wete tot in Limburg zelf dao nog neet ederein vaan euvertuig is. Zoe mote veer nog regelmaoteg in de gezèt leze tot ’t Limburgs neet besteit meh tot allein spraoke is vaan ‘nen hieleboel versjèllende dialekte. Tot die dialekte same ein taol vörme mèt versjellende variante ligk bij ’n officieel erkinning al weer get mie veur de hand.
Tot ‘n taol mie variante heet is bepaold neet uniek veur ‘t Limburgs meh dat gelt in feite veur eder levende taol. ‘t Ingels wat in Los Angeles gesproke weurt wiek aof vaan wie me in Londe sprik en soortgelieke versjèlle zien te vinde tösse ‘t Frans vaan Peries en dat vaan de Franse provincies. En tot d’r gein standaard Limburgs besteit is ouch neet uniek: ouch in Noorwege is d’r neet éin taolvariant die officieel es Noors te book steit meh sprik en sjrijf me in versjèllende variante. Mesjiens ‘n gooj aonleiing um vaan noe aof aon d’n terme dialek neet mie te gebruke en te spreke vaan eus Limburgse taol?