‘t Oranje Beukske in Èll

‘n Plaatselikke jubileum activiteit van de vastelaovesvereiniging in Èll resulteertj in ’n veur Limburg uniek beukske. Dao móst ’n beukske kómme aan de handj woeë-van minse baeter de spelling kónne toepasse, en den ouch nog ‘ns ‘ne kieër toegesjreve op ’t Èller dialect. Ard van Roij names ’t jubileumcomité, en Jan Custers en Paul Custers as kinners van taal en dialect ginge al in de zomer van 2016 ane slaag mèt ’n aantal ideje euver de aanpak. Oeteindelijk koos men d’rveur óm ’t book “Spelling 2003 voor de Limburgse dialecten” (Raod veur ’t Limburgs/Veldeke Limburg) as basis te numme. Vervolges waerdje per relevant hoofdstök ’n blok toelichting mèt betrèkking toet en veurbieëldje oet ’t Èlls gesjreve.

Dao zeen ouch in verwirktj appaarte hoofdstökke mèt verwiezinge nao aoj breve die men vreuger sjreef nao familie wiet wèg en verhaole oet ’t plaatselik vastelaovesblaedje De Kwakel. ’t Zeen grappige toevoeginge aan ’t beukske mer ouch óm aan te toeëne det minse ’t dialect waal ‘ns “vernederlandsdje”, of óm te laote zeen det dialect nogal verangerlik is gewaestj inne loup vanne jaore. Ouch dialectoloog Pierre Bakkes waerdje d’rbie gehooldj veur de lèste advieze en taalkundige tips. ’n Veurwoord en inhoudsopgave make ’t beukske cómplieët en tot ’n handjzaam naoslaagwerk van 64 pagina’s mèt de naam: ’t Oranje Beukske; Plat Èlls, wie sjriefs se det? Aan te sjaffe via de webwinkel.
← Ga terug