Tegelse Declamatiewedsjtriéd Veldeke
Vriedig 21 april ware weej wir te gas beej De Harmoniezaal in Tegele, woë de finale-aovend van de Tegelse Declamatiewedsjtriéd van Veldeke plaatsvông. De zaal sjtruimde al sjnel vaol met deilnimmers, femielies, vrinde, liërkrachte en angere fans, die door besjteurslid Pieter Ebus woorte welkôm geheite. Daonao noom Iris Vercoulen de microfoon euver öm de kinger te ôntvange en ze te begeleide beej ’t declamere van eur versje. Wat ‘n fiës öm al die talentjes te zeen! We krege d’r allemaol kriemels van in d’m bóek. Kei sjpannend huër, öm as deilnimmer vanaaf die hoëge buun in zônne volle zaal te kiéke met de sjiénwerpers op dien sjnóet. Maar wat zien weej as werkgroep gruëts det ze d’r wir allemaol sjtinge.
In de pauze meugde idderein zich laote verwôngere door de goochelkunste van Hayke Bongaerts en kôs idderein efkes lekker lache en ôntsjpanne. Det waas vur de jury waal angers, want die hadde de zjwaore taak öm alle declamaties te beóerdeile. Deze kiër hadde we ’n bezônger, prinsesselik dreejtal daotoe bereidgevônge, namelik ’t damestrio van 2023 van VG De Beerpiep: Sandra, Esther en Wendy. Zeej zote zichbaar te geniete en sjtinge naoderhank te popele öm wir ens ’n buun te beklumme en de priésóetsjlaag bekend te make!
D’n óetsjláag van de Tegelse finale-aovend is as volg:
Ôngerbouw:
1. Ize Willems
2. Vayèn Smedts
3. Liza Hanraets
Middebouw:
1. Siem Stapel
2. Bente Daniels
3. Isa Berends
Baovebouw:
1. Lynn Helmes
2. Phoebe Hauzer
3. Jayson Daemen
De nummers 1 en 2 zeen we truuk op de Limburgse finale op 3 juni 2023 in Dok6, Panninge.
Umroop Peel & Maas zal op 18 mei beej Dwars door Limburg beelde laote zeen van ôs declamaties. D’n hiër Jos Verbong haet foto’s gemak die te zeen zien op de website van Veldeke Venlo en op ôs eige Facebook pagina: Declamatiewedsjtriéd Veldeke Tegele.
Groëten dank aan alle deilnimmers, sjriévers, liërkrachte, aanwezige en idderein dae zich haet ingezatte vur deze sjoënen aovend. As dit enthousiasme zoë doorgegaeve blief waere, den zien weej nag jaore verzekerd van vuël verbinding en identiteit binne de Tegelse gemeinsjap.
Werkgroep Tegelse Declamatiewedsjtriéd Veldeke,
Truus Verbong
Nicol Ebus
Susan Janssen