Thea van Thor-van Nunspeet wint Groet Mestreechs Dictee

Op zoondag 21 mei 2023 voont de 18de editie vaan ’t Groet Mestreechs Dictee plaots in ’t Centre Céramique. Zoe’n 90 deilnummers prebeerde d’n teks gesjreve door Phil Dumoulin zoe good meugelek op te sjrieve.

Thea van Thor-van Nunspeet doog dat ’t bèste. Mèt mer 5 fout woort zie winner vaan ’t Groet Mestreechs Dictee 2023.
In 2019 had zie ouch al ‘ne kier gewónne. De nómmers 2 en 3, Eddy Zeelen (oet Linne!) en Marij Bonnemayer, maakde respectievelek 6 en 7 foute.

Gemiddeld 30 foute

Bekans 60 lui doge ‘officieel’ mèt en maakde gemiddeld 30 foute. Dat is eveväöl es verleie jaor wie d’n teks door Marjorie Rieu, de vrouw vaan André Rieu, woort gesjreve. André Rieu zörgde zjus wie verleie jaor mèt zien Mestreechs Salon Orkes veur get oontspanning naotot de deilnummers veerdeg waore mèt sjrieve en de jurie aon ’t werk waor.

40 jaor Leesplenkske

Dit jaor stoont ’t dictee in ’t teike vaan ’t Leesplenkske vaan de Mestreechter Taol. ’t Is dit jaor 40 jaor geleie tot Veldeke Mestreech ’t leesplenkske introduceerde. En al 40 jaor is ‘t e groet succes. Nao sjetting zien mie es 16.000 leesplenkskes in umloup. Reie veur Veldeke Krink Mestreech um Phil Dumoulin, d’n einege initiatiefnummer dee nog oonder us is, te vraoge d’n teks te sjrieve veur ’t dictee vaan dit jaor.

Veur de completen teks vaan ‘t Groet Mestreechs Dictee 2023 kint geer hei klikke.