Thea van Thor wint Groet Mestreechs Dictee

’t Groet Mestreechs Dictee 2019 wat zoondag 28 aprèl gehawwe woort in ’t Centre Céramique is mèt neet mie es 2 foute gewonne door Thea van Thor. De winneres sjreef verleie jaor nog veur spek en boene mèt en dörfde ’t dit jaor aon um veur ech mèt te doen, en mèt succes! D’n Top 3 waor zoewiezoe ’n vrouwe-aongelegenheid want de nómmers twie en drei in d’n oetslaag waore Patricia Paulissen mèt 6 en Huguette van Dooren-Lahaye mèt 8 foute. Vaan de deilnummende gróppe scoorde zjus wie veureg jaor ‘De sjeigelenden dictionair” ’t bèste. In totaol naome 75 persoene deil aon ’t dictee, oonder wee aajd stadsprins Armand Peereboom.  Per persoen woorte gemiddeld 34 foute in d’n dictee gemaak.

Tant Nèske

D’n teks vaan de zestiende editie vaan ’t Groet Mestreechs Dictee woort dit jaor gesjreve door de in Mestreech gebore en getoge Cécile Narinx. Cécile Narinx is mode-redacteur bij de Volkskrant en waor ieder hoofredacteur bij de tiedsjrifte Elle en Harper’s Bazaar. Zie is dus geweend um in de pen te klumme. Ze waor zelf aonwezeg um ’t dictee veur te leze. ’t Waor te verwachte tot de mode ’n belaankriek thema in häören teks zouw zien. Meh tot de euverbekinde ‘tant Nèske’ (die vaan dat wit en zwart kalbeske) ’n hoofrol zouw speule waor toch ’n verrassing.

Instinkers

Al waor ’t gemiddeld aontal foute minder es veureg jaor, de jury had toch z’n han vol um alle foute te corrigere. D’r zaote nog ummertouw ‘ne knab unne in de gesjreve tekste vaan de deilnummers boe dat eigelek ‘ne had mote zien. En ouch ut boe dat ’t mós zien. Meh de mieste foute zaote toch in e paar instinkers wie bloodkrallekèttel (aonein gesjreve!), zije pyzjema’s (zijden pyama’s) en  zjuwiele (en neet zjewiele). Geer kint de gansen teks vaan ‘t dictee hei naoleze.

Veur spek en boene

Neve de 65 fanatieke deilnummers, sjreve dit jaor 10 enthousiaste persoene ’t dictee veur spek en boeke mèt. Ze koume deveur oet ’t Mestreechs neet zoe good te beheerse um mèt de kinne dinge nao de prijze. Zie kóste nao aofloup hun dictee zelf corrigere aon de hand vaan de officiëlen dicteeteks. En um de mood drin te hawwe: de winner vaan dit jaor sjreef verleie jaor nog veur spek en boene mèt!

← Ga terug