Troeësbóch: Kèrkraojse tekste veur begraffenisse en crematies

Wie verleie jaor dialekdiechteres Marloes Lammers-Hoekstra bij de Stichting LiLiLi ’t idee dropde um e book te make mèt Kèrkraojse tekste veur gebruuk bij begraffenisse, crematies of ander aofsjeidsdeenste, waor de Stiechting LiLiLi daoveur metein te vinde. Mèh ’t zouw allein realiseerbaar zien es väöl Kèrkraojse sjrijvers aon ’t projek zouwe wèlle mètdoen én es dao genóg foondse veur te vinde waore. ‘ne Mail nao de bekinde auteurs lieverde väöl positief reacties op en naovraog bij ’t Monuta Helpt-foonds ‘ne cheque mèt ’n weerde vaan € 2.500,-, boemèt de basiskoste vaan de productie gedèk zouwe kinne weure.

Dus kraoge alle bekinde Kèrkraojse sjrijvers de vraog of ze aon de slaag wouwe goon. Dat rizzelteerde in ‘ne berg aon gediechte, verhaole en spreuke. Veer Veldekepries winners doge mèt: Yoep Offermans, Audrey Laven, Wim Heijmans en Paul Weelen, de bekinden diechter Wiel Kusters lieverde e paar tekste en John Paffen sjreef neet alleinj twie tekste meh heer maakde ouch tientalle teikeninge die veur ’t book gebruuk mochte weure. Zelfs börgemeister Petra Dassen-Housen sjreef ‘nen teks. In totaol sjreve 30 auteurs zoe’n 70 tekste. Marloes Lammer-Hoekstra en Paul Weele doge same de redactie.

’t Book ligk oondertösse bij d’n drökker en zal op vriedag 20 mei aonstaonde um 19.30 oor  geprizzenteerd weure in d’n aula vaan Schifferheide mèt bijpassende koffie en vlaoj.  De Kèrkraojse Monuta-ambassacrice Mona Slob zal daan aon de penningmeister vaan de Stichting LiLiLi Luiz Oliveira (dee trouwens ouch de vörmgeving vaan ’t book veur zien rekening naom) de cheque euverhandege. ’t Ierste exemplaar vaan ’t book geit nao börgemeister Dassen-Housen.

‘t Book zal in de bookwinkel koume te ligke veur de pries vaan € 16,90.

De Stiechting LiLiLi zörg sinds 25 jaor veur de oontwikkeling en verspreiing vaan Limburgstaolege beuk. Dat rizzelteerde in romans, gediechteboondels, leedteksboondels, stripbeuk, printebeuk, veurleesbeuk en verhaoleboondels in bekans alle Limburgse streektaolvariante. ’T Troeësbóch is deil 85 vaan de reeks.

← Ga terug