‘Tsezame’ tege Alzheimer

De fine fleur vaan de Limburgse artiestewereld heet mètgewèrk aon de opnaome vaan ’t leedsje ‘Tsezame’, wat donaties moot helpe ginnerere veur ’t Alzheimeroonderzeukfoonds Limburg. ’t Initiatief is vaan Paul Weelen, dee ’t leedsje ouch sjreef en componeerde. Groete naome wie Beppie Kraft, Jack Vinders, Martin Hurkens, Ivo Rosbeek en Guido Frissen (Schintaler), joonk talent wie Fiorenza Ruijters, Dwaybe Horbach en Mella Klaessen en nog mie Lilmburgse artrieste höbbe hun mètwèrking verliend.

’t Leedsje is opgenome op donderdag 23 augustus in de Marlstone studio in Ulestraote. De officieel oetgaof vaan ’t leedsje (via Spotify, Itunes etc.) is gepland veur 1 december. Meh geer kint hei alvas ’ne video zien vaan ’t opnumme in de studio.

Ederen arties zingk in zienen eige variant vaan ’t Limburgs. Wat dat betröf is d’n titel vaan ’t leedsje netuurlek ouch ‘n verwijzing nao de krach vaan de diversiteit in eus provincie. ’t Refrein weurt in ’t Kirchroadsj gezoonge. ’t Is veur ’t iers tot Beppie Kirchroadsj zingk!. En veur väöl vaan de ander artieste gelt dat ouch.

Alzheimeroonderzeukfoonds Limburg maak ziech sterk veur medisch-wetensjappelek oonderzeuk vaan ’t Alzheimer Centrum Limburg vaan ’t Maastricht UMC+. Alzheimer Centrum Limburg bevordert ’t verkriege, touwpasse en verspreie vaan kinnes euver gezoond cognitief aajd weure, vergeetechtegheid en dementie. Oonderzeuk wat de kwaliteit vaan leve verbetert vaan zoewel de patiënte es vaan hun femilie.

Paul Weelen zeet: “Ummer mie lui kriege te make mèt dementie, zoe neet persoenlek daan toch in hun directe umgeving. Vaandao tot dit Centrum euze steun verdeent. Noe mer hope tot ’t leedsje good weurt oontvaange en dèks gespäöld weurt op regionaal en nationaal zenders. ‘Tsezame’ is ’t finaleleed vaan de musical ‘Sjiet in de bóks’ en geit euver vrede, herinneringe en gedinke en de krach vaan samewèrke.”

← Ga terug