Vaan euze veurzitter: e Gediech es troes in tije vaan corona

Leef lede vaan Veldeke en ander leefhöbbers vaan de Limburgse taol,

Eder zie vak, dus bij de challenge vaan Pieter Ebus, euze penningmeister, aon miech um in tije vaan corona zelf e gediech in ’t dialek te sjrieve, höb iech de hölp ingerope vaan diechter en winner vaan de Veldeke Literatuurpries 2004 Har Sniekers.

Same beeje veer uuch ’t gediech “Misse” aon es troes. E gediech wat alle leefhöbbers vaan eus moojertaol in deze meujeleken tied ‘n hart oonder de reem moot steke.

Misse

Stilstaondj op ’t strandj
zeen ich de wiej zieë
en dink aan dich
guns
aan de uueverkantj.

Veuldje ich in mien handj
mer ein traon oet dien ouge
van leefdje of verdreet
of
heel ich dich mer vas
aan ein vaemke van diene jas.

Det waas mich lever
es hiej die ganse zieë.

’t Is mer vuuer ’n jaor of twieë,
zags se.

In de gaard bluje de blome
en de kese zeen al riep,
ich wil d’r dich waal gaeve
mer mien handj reiktj
neet zoea wied.

Har Sniekers