Väöl animo bij Staotelede veur Hoes veur ’t Limburgs

Op vriedag 15 aprèl höbbe vertegenwoordegers vaan Veldeke Limburg, de Raod veur ’t Limburgs, Levende Talen Limburgs, Cubiss en ’t Hoes veur de Kunste ’n èlftal lede van Provinciaol Staote bijgepraot euver hun veurstèl veur de opriechting vaan ’n Hoes veur ’t Limburgs: ’n fysieke plaots boe ederein dee get wèlt wete euver of get wèlt doen mèt de Limburgse taol terech kint veur advies en oondersteuning.

De directe aonleiing veur dees bijeinkoms waor de vergadering vaan de Staotekemissie Cultuur en Sameleving op 11 miert, boe Esther van Loo naomens bovegeneumde organisaties moch inspreke. Toen kaome versjèllende fracties tot de conclusie tot ze in beginsel positief tegeneuver ’t veurstèl stoonte, meh gere get oetgebreider in gesprek zouwe goon mèt de initiatiefnummers.

Dat gebäörde dus op 15 aprèl in ’t Provinciehoes in Mestreech. Al de aonwezege fracties kraoge de meugelekheid um hun standpunt euver ’t veurstèl kinbaar te make en vraoge te stèlle. Oet de roondgaank langs de versjèllende fracties bleek tot ze zoonder oetzundering mie wèlle doen um ’t gebruuk vaan ’t Limburgs in ’t openbaar leve en ’t oonderwies te stimulere. Euver de opriechting vaan ’n Hoes veur ’t Limburgs hadde ze versjèllende vraoge: wie zörge veer deveur tot ’n aonbod vaan ’t Hoes aonslut bij de vraog vaanoet de sameleving, wat veur rol is weggelag veur de bibliotheke en wat veur indicatore kinnen veer straks gebruke es maotstave veur succes?

Daankzij de positief groondhawding vaan de Staotelede woort ‘t ’n ope en geanimeerd gesprek, mèt es eindconclusie tot de euvergroete mierderheid vaan de Staotefracties de wins vaan ’t Limburgs taolveld um ’n Hoes veur ’t Limburgs op te riechte oondersjrijf en ziech daoveur wèlt inzètte in de polletieke besluutvörming.

 

← Ga terug