Veerde Dr. Lou Spronck-lezing door Miet Ooms
Door oonveurzeen umstandeghede kint de oersprunkelek aongekóndegde spreker Rik Vosters op donderdag 21 september de veerde Lou Spronck-lezing neet prizzentere. Miet Ooms nump noe de lezing veur häör rekening. D’n titel vaan häör lezing is: Algemeen Nederlands of eigen Nederlands? Over het Nederlands dat we delen en dat ons soms scheidt.
De lierstool Taalcultuur in Limburg (Universiteit Mestreech, Faculty of Arts and Social Sciences (FASoS) heet in 2012 de Dr. Lou Spronck-lezing ingestèld. Lou Spronck heet tijdens zie werkzaom leve aon ‘t Jeanne d’Arc College in Mestreech es lieraar, conrector en rector, meh veural in d’n tied daonao, gepubliceerd euver de Limburgse historie, literatuur, dialek en volkskunde.
Mèt de instèlling vaan de twiejaorlekse Dr. Lou Spronk-lezing wèlt de lierstool waardering ute veur de kwaliteit vaan zien oonderzeuk. Daoneve be-oug dees lezing ’t belaank vaan wetensjappelek oonderzeuk nao taol en cultuur in Limburgs ziechbaar te make veur d’n academische wereld en veural veur ’t groet publiek.
De ierste LS-lezing woort in 2016 gehawwe door Petra Stiene (‘Geer zeet neet vaan hiej,,,’. De grenzen van het Limburgs’), de tweede in 2018 door Martin Paul (‘De grenzen van mijn taal zijn de grenzen van mijn wereld. Een pleidooi voor meertaligheid’, de derde in 2021 door Michiel de Vaan (‘Geboorte en dood van het Maastrichts, een historisch taalkundige blik’).
Samevatting lezing Miet Ooms
In dees lezing gooon veer aon de hand vaan de standaardisatiehistorie vaan ’t Nederlands nao, boerum dao versjèllen zien tösse ’t Noorde en ’t Zuide vaan ’t taolgebeed. Veer starte bij d’n opbouw vaan ’n standaardtaol in de zestiende iew. Daonao koume e paar sleutelmominte in de historie aon bod die ‘ne groeten invlood höbbe gehad op de wijer standaardisering. De focus ligk op de twintegste iew, boe-in op ’t momint tot in Nederland d’n aondach veur taolzörg verslap, die in Vlaondere zjus volop aonwezeg is. En veer goon door tot de iewwisseling boe-in Vlaondere en Nederland ziech weer vinde. Es lèste stoon veer kort stèl bij de vraog wat dat standaardisatieverhaol beteikent veur de dialekte in allebei de Limburge.
Insjrieve
Insjrieve kint via deze website.
De lezing vaan Miet Ooms versjijnt later in drök. Geïnteresseerde kinne, oonder vermelling vaan hunne naom en adres, ‘n exemplaar aonvraoge door e beriech aon ‘t sikkertariaat.