Veldeke Declamatiewedstried 2019

Veldeke Limburg organiseert idder jaor ein declamatiewedstried veur kinder van de basisschoeël. In verschillende laeftiedscategorieën kómme de lierlinge van verschillende schoeële op de buun um eur dialek-teks (proza of poëzie) veur te drage.

De finale zal dit jaor plaatsvinde op zaoterdaagmiddaag 25 mei in DOK-6 in Panninge, aanvang is um 13.00 oor. D’r doon weer 28 kinder mei, kinder van groep 3 t/m 8. Vanoet de ganse provincie kómme dan weer de winnaers van de veurróndes nao de theaterzaal um eur gedichte te laote hure en zeen aan ‘t publiek en netuurlik ouk aan de viefkoppige zjury.

Dit jaor besteit de zjury oet;

Herm Pollux, Herm waas in 2018 stadsprins van Jocus in Venlo en is in ’t verleje ónderscheide as Commandeur in de Orde van de Zwalm beej Jocus en as Doctor Humoris Causa van de Narren Universiteit Limburg. Herm haet ouk al ens in de Venlose zjury meuge zitte. En zit al jaore in de finale zjury van de buut kampioenschappe.

Katja Henz, Katja is veural bekint van eur vastelaovesleedjes waomei zeej al 3 kier de finale van ’t LVK wis te bereike. Maar Katje haet vuuel mier te baeje, ze haet al diverse Limburgse CD’s gemak.

Ton van de Wijngaard, streektaalfuntionaris, Ton ontwikkelt same met Veldeke Limburg en de raod veur Limburgs activiteite die gerich zien op de streektaaleducatie en ónder de aandach bringe en laevend halde van de Limburgse taal.

Anke Peters, Anke speult regelmaotig mei in tenielstökke en de Heiligdomsvaart in Zöstere. Anke haet zelf 5 kier meigedaon aan de declamatiewedstried van Veldeke en woort 2 kier Limburgs kampioen.

Hortense Brounts, veurzitster van de zjury, Hortense speult teniel met Veldeke en is veurzitster van Veldeke kring Mestreech en is geïnteresseerd in alles waat mit Mestreech en mit ‘t Mestreechse te make haet. Hortense  is professor aan de NUL (Narren Universiteit Limburg)

Tiedes ’t jury beraod kriege weej ein act van Jelke Schijlen oet Mestreech. Op de foto: de winnaers van 2018

 

← Ga terug