Veldeke Jaorboek oetgestèld

Tot ziene groete spiet heet ’t bestuur vaan Veldeke Limburg mote beslete um de oetgaof vaan eus Jaorbook 2022 e jaor op te sjuive. Personeel probleme bij de bezètting vaan de redactie zien dao debet aon. Versjèllende redactielede die ziech jaorelaank höbbe ingeat veur ’t Jaorbook höbbe de redactie de aofgeloupen tied verlaote. Dao kaom bij tot d’n einege redacteur mèt ’n vaste aonstèlling bij ’t Hoes veur de Kunste, de streektaolfunctionaris, um medische reie veur langen tied ge werk kós verzètte.

Volgend jaor extra dikke editie

’t Oetgeve vaan ’t Jaorbook vraog um perceize en vakkundegen inzat vaan ’n deskundege redactie. Deen inzat kós oonder de gegeve umstandeghede neet gegarandeerd weure. Vaandao tot beslote is de oetgaof vaan ’t Veldeke Jaorbok 2022 te combinerenj mèt dat vaan ’t loupende jaor 2023. In 2024 zal bijgevolg ’n extra dikke editie vaan ’t gecombineerde Jaorbook 22/23 versjijne

Nui redactielede

De redactie prijs ziech geökkeg tot ze oondertösse veur aonvölling vaan häör geledere heet kinne zörge in de persoene vaan Bas Vissers vaan Veldeke Krink Venlo en Frens Bakker, docent aon de Radboudunmiversiteit in Nimwege. De huidege lede Peter Klein en Guus Urlings blieve deil oetmake vaan de redactie. Daomèt is de redactie weer genóg bemand um de koumende tied ’t Veldeke Jaorbook de kwalliteit te verliene die we daovaan geweend zien.

Euvermach

’t Bestuur vaan Veldeke Limburg vraog begrip veur ’t feit tot de vereineging ’n vrijwèllegersorganisatie is die ’t groetendeils moot höbbe vaan d’n oonbezoldegden inbringk vaan enthousiaste leefhöbbers vaan de Limburgse taol. Dat liet oonverlèt tot veer bij eus werk en eus oetgaove hoeg eise stèlle aon de taolkundege kwalliteit devaan. Soms leit dat tot ’n aofweging um e stepke trök te doen, wie jaomer veer dat ouch vinde.