Veldeke Jaorbook 2019 geprizzenteerd
De prizzentatie vaan ’t Jaorbook 2019 vaan Veldeke Limburg voont dit jaor vaanwege corona plaots zoonder speciaol bijeinkoms mèt sjrijvers en gaste. Meh dat deit neet aof aon de kwaliteit vaan d’n inhaajd vaan ’t jaorbook, boe de redactie ziech weer ins in de boch heet gegoejd um e zoe gevarieerd meugelek aonbod vaan artikele aon te beeje.
Zoe vint geer oonder mie ’n deepgaond artikel vaan Pim Thielen euver de dialectpoëzie vaan de Remundsen diechter Jacques Graus. Wijer ’n artikel vaan ex-streektaolfunctionaris Pierre Bakkes euver bezunder wäörd in de Limburgse taol die oontspringe aon de kathelieke traditie. En daan ’n opmèrkeleke vergelieking tösse de taol vaan Limburgs en die vaan Kazachstan vaan de hand vaan Esther van Loo. En de veurkant vaan ‘t Jaorbook verwijs nao e verhaol euver de rol vaan Ingeleprintsjes in ‘t vreuger daogeleks leve
Guus Urlings sjreef ’n in memoriam veur Netty Engels-Geurts die bekind is vaan häör Limburgse kookbeuk. Els Diederen completeerde heer oetgebreid euverziech vaan häör Volksbotanie, Limburgstaolege naome vaan blomme en plante boe ze in de veurege oetgaof vaan ’t Jaorbook aon begonne waor. Hoeglierare Leonie Cornips en Roeland van Hout geve hun visie op de Staot vaan ’t Limburgs en Bas Vissers vaan de Veldeke Krink Venlo sjrijf euver Venlose etymologie. Vicevoorzitter Lei Heijenrath besjrijf Limburgse plaotsnaome aon de hand vaan ’n achtiende iews documint oet Kèrkraoj.
En dat is nog lang neet alles wat te leze vèlt. Geer kint de compketen inhaajd vaan ’t Jaorbook hei inkieke.