Veldeke kint wel get hölp vaan vrijwèllegers gebruke
Veldeke is ’n vereineging die gans op vrijwèllegers steunt. Alle bestuurslede en mètwèrkers doen hun werk oonbezoldeg. De leefde veur de Limburgse taol is hun motivatie. Meh wie dat is mèt väöl vrijwèllegersorganisaties: dat werk kump hiel dèks op dezelfde sjouwers terech. Daorum doen veer zoe noe en daan ‘ne oproop um nui vrijwèllegers te werve. Want de Limburgse taol verdeent ’t um mèt alle krach oondersteund te weure.
Dus es geer get tied euver höb en op zeuk zeet nao ’n zinvol en leuke activiteit, melt uuch daan aon bij Veldeke. Dat kint zoewel op lokaal nivo, bij ein de van 10 Veldeke kring die door de ganse provincie verspreid zien. Dat kint ouch op provinciaol nivo, boe koepelorganisatie Veldeke Limburg ouch altied get steun kint gebruke. Veer zalle daan same bekieke wie en boe geer ’t bèste kint weure ingezat.
Ouch veur kortloupende projekte
En dat hoof neet per se veur oonbepaolden tied te zien. Es geer zègk: iech wèl bès wel ins veur e kortloupend projek weure ingesjakeld, daan kint dat netuurlek ouch. Veer hawwe ’n lies bij vaan lui die veer kinne oprope es hun expertise of ervaring vaan pas kump bij de oetveuring vaan ein of ander activiteit. ’t Belaankriekste is tot geer uuch betrokke veult bij de doelstèlling vaan Veldeke: ’t behaajd en de bevordering vaan de Limburgse taol in al zien variante.
Wèrk mèt aon website en nuitsbreef
Hiel concreet: bij Veldeke Limburg zeuke veer vrijwèllegers die ziech wèlle inzètte veur de website en de nuitsbreef. Dat kint es plaotseleke correspondent of ouch es redactielid vaan de communicatiegróp. Daobij is ’t wel hendeg es geer Limburgs neet allein kint spreke meh ouch min of mie wèt wie dat gesjreve moot weure. Meh ouch dat kint gelierd weure, es geer uuch dao minder zeker bij veult.
Laot uuch ins vaan eure bèste kant zien en melt uuch aon via ’t insjriefformuleer veur vrijwèllegers. Dat is hielemaol zoonder verpliechtinge. Veer numme kontak mèt uuch op um te zien wat veer us oonderein te beeje höbbe. Wee wèt kint dao nog get sjoens oet greuje. In ’t belaank vaan eus sjeon Limburgse taol.