Veldeke Kring Kontakdaag in Remund

Veur ’t iers sinds langen tied kóste de vertegenwoordegers vaan alle lokaal Veldekekring ziech weer ins in persoen treffe bij ‘ne Kontakdaag. Dee voont deze kier plaots in de ECI in Remund en had e get aongepas karakter in vergelieking mèt ander jaore. Dao voonte noe ’n deil brainstörmsessies plaots boebij op ’n interactief meneer gelegenheid waor um vaan gedachte te wissele, de kring oonderein en mèt ’t provinciaol bestuur. Op d’n agenda stoonte oonder mie e veurstèl veur wijzeging vaan de Statute en ’t Hoeshawdelek Reglemint vaan de vereiniging en de planne vaan de versjèllende commissies, Activiteite, Oonderwies en Communicatie. Wat de Statute betröf kaome versjèllende vraoge boe-op neet zo gaw ’n antwoord meugelek waor. Die zalle obbenuits weure veurgelag aon de notaris en daan – es de antwoorde tijdeg besjikbaar zien – weure ingebrach tijdens de volgende Algemein Ledevergadering.

Commissie Oonderwies

De Commissie oonderwies zèt ziech in um de Limburgse taol ’n plaots in ’t oonderwies te geve. Dat wèlt neet medein zègke tot de regulier lèsse in ’t Limburgs plaots mote vinde meh ’t is mie ’n kwestie vaan zeuke nao gelegenheid um eus taol op ein of ander meneer in te passe in ’t ruuster. Zoe zien dao oontwikkelinge in ’t basisoonderwies um in ’t middagdeil vaan de lèsprograms mie ruimte te geve aon same ete, same bewege en cultuur. Dao zouw ’t Limburgs ouch thoes hure. Meh alles steit of vèlt mèt de bereidheid vaan sjaolbesture um dao-aon mèt te wèrke én aon lierkrachte die de Limburgse taol good beheerse. Poginge in ’t verleie um dat te bewèrkstèllege waore neet erg succesvol. Vaandao tot ouch gekeke weurt nao wie via ander instanties, zoe wie bibliotheke of vastelaovendsvereineginge get te bereike.

Commissie Activiteite

De Commissie Activiteite oontvawt planne veur e “cyclisch jaorprogram” mèt eder jao trök koumende activiteite. E veurbeeld daovaan is d’n Daag vaan de Moojertaol op 21 fibberwarie, bij gelegenheid boevaan de aofgeloupe jaore al versjèllende geslaagde acties höbbe plaotsgevoonde. Meh dao zalle mie vaan dergeleke aonleiinge gevoonde mote weure um deveur te zörge tot Veldeke door ’t jaor eweg aondach vraog en krijg. Daobij weurt door ’t Provinciaol bestuur oetdrökkelek e beroop gedoon op d’n inbringk vaan de lokaal Veldeke kring, zowel wat betröf ideeje es wat betröf de oetveuring daovaan. ’t Lievere vaan lui die geopperde planne kinne oetveure blijf e probleem veur de provinciaol commissies.

Commissie Communicatie

De Commissie Communicatie vraog aondach veur ’t vervolg op ’t groet Imago oonderzeuk wat begin dit jaor is oetgeveurd en geprizzenteerd. Noe dudelek is wie de Limburgse taol deveur steit en wat veur imago Veldeke heet oonder inwoeners vaan de provincie, is d’n tied gekoume um mèt ‘n geriechde communicatiecampagne daobij aon te slete en verbeteringe nao te streve. Oet ’t oonderzeuk weurt dudelek tot ’t veural de jonger provinciegenote zien die daobij speciaolen aondach verdene. De vraog is dus wie Veldeke ziechzelf én de Limburgse taol wèlt prizzentere um beter aon te slete bij wat jonger lui raak en intrèsseert. Die vraog weurt in ierste instantie veurgelag aon de lokaal kring en mèt behölp vaan de verkrege antwoorde zal ‘n “briefing” weure opgestèld boemèt e professioneel communicatie-adviesburo aon de slaag kint um e veurstèl veur ’n campagne te formulere.

← Ga terug