Veldeke Kring Kontakdaag in Mestreech

Eine kier per jaor koume bestuursleie vaan de lokaal Veldekekring bijein um ziech oonderein bij te praote euver hun activiteite en planne. Dees kier waor dee kontakdaag georganiseerd door Veldeke Krink Mestreech en dus kaome op zaoterdag 2 september vertegenwoordegers vaan bekans alle kring (allein Valkeberg waor verhinderd) nao de provinciehoofstad. Ouch Veldeke Belsj Limburg waor vertegenwoordeg door de Krink oet Hasselt.  Dat bijpraote lök ’t bèste es me same get oondernump en dus had Veldeke Mestreech e program opgestèld boebij de deilnummers woorte roondgeleid door e stökske oonbekind Mestreech, te wete ’t Belvedère terrein. Dao is sinds kort de aw Sphinx febrik umgetouverd in e studentehotèl, boe-in veural boetelandse studente veur e paar maond tot e jaor ’n compleet ingeriechde kamer kinne heure. Meh door Belvedère kinste ouch sjoen wandele sinds de Noorderbrök is verlag en e stökske vergete natuur langs de aw vestingwèrke touwgaankelek is gewore.

Naotot de bestuursleie bijeen waor gekoume in ’t nui Fèlmtheater Lumière, wat ouch op dat terrein ligk, woorte ze in gróppe opgedeild die zoe waore samegestèld tot de kring ziech oonderein tegekaome zoetot de ierste oetwisseling vaan ideeë al kós plaotsvinde. Via ’t Bassin, de aw binnehave vaan Mestreech die al ieder gans is opgeknap, góng de wandeling nao ‘t infocentrum vaan ’t Belvedère projek, in d’n awwe showroom vaan de Sphinx febrik. Daonao trok ederein via de Lieg Frónte nao ’t clublokaal vaan ’t “Mestreechs Rizzjemint”, boe de lunch woort geserveerd. Alweer ’n gooj gelegenheid um ziech oonderein beter te liere kinne. D’n daag woort beslote in Museum Marres boe ’n expositie euver kuns en archeologie woort oetgelag en bekeke. In d’n hoof vaan dat museum voont daonao nog ’ne riechtege ‘speed date’ plaots, boebij alle deilnummers woorte gekoppeld aon iemes vaan ‘nen andere krink.

Wie ederein roond ’n oor of vijf weer op hoes aon trok waore hiel get ideeë en planne oetgewisseld, wat noe zjus ouch de bedoeling waor. Dao kaom ouch nog eve de nui oontwikkeling vaan de spellingsapp ter spraoke dee recentelek gelanceerd is door Yuri Michielsen vaan de Universiteit vaan Mestreech. Veldeke Krink Mestreech heet al bekind gemaak tot zie ‘ne veurliechtingsaovend euver deen app geit organisere veur häör lede en de ander kring goon in noavolging daovaan bekieke of zie dat ouch wèlle doen. De veurzitter vaan Veldeke Mestreech, Hortense Brounts,  moch wie gebrukelek es aofsleting nog de medaalje vaan de krink aon de Veldeke-veendel bevestege en dee euverhandege aon de Krink Weert, dee volgend jaor aon de beurt is um de kontakdaag te organisere. Zoe heet ouch Veldeke zien tradities. Daonao kós ederein content trök nao hoes. Veur ‘n foto-impressie vaan deen daag kiek geer hei.