Veldeke Kringekontakdaag in Venraoj
Op zaoterdag 30 september kaome de bestuurders vaan de lokaol Veldeke kring bijein veur de jaorlekse kontakdaag. Deze kier veel de Veldeke Krink Venroj de ier te beurt um de ander kring te oontvaange mèt ’n intrèssant program. Jaomer genóg kóste neet alle kring acte de présence geve, wat veur Veldeke Limburg veurzitter Reg van Loo aonleiing waor um nog ins te pleite veur ’n intensief samewèrking tösse de kring. Door same te wèrke kinne de krachte geboondeld weure en is Veldeke beter in staot zien ideale vörm te geve en de Limburgse taol euver de ganse provincie te bevordere.
Museum De Peelstreek
De kontakdaag begós in Museum De Peelstreek in Ysselsteyn. Nao de gebrukeleke koffie en bruudsjes kóste alle deilnummers hunnen eige weeg zeuke door ´t museum, boebij d´n directeur aonwezeg waor um zoe nudeg teks en oetlag te geve. En dao waor genóg te zien euver de historie vaan de Peel en vaan de lui die dao gewoend en gewèrk höbbe, inclusief ’n oetgebreide verzameling vaan alle werktuig wat daobij te pas waor gekoume. Veural ’t verhaol vaan Nico vaan Melo, de legendarische fokhings, dee z’ne kop noe hei aon de moer hingk, maakde indrök.
Oorlogskèrkhof Ysselsteyn
Daonao woort ’t gezèlsjap in ’n houfkaar gelaoje en dweers door e stökske Peellandsjap, inclusief de daobij hurende landeleke geure, nao ’t oorlogskèrkhof Ysselsteijn gebrach. Dat kèrkhof is bezunder umtot dao veural Duitse soldate oet d’n twiede WO begraove zien, soldaote vaan d’n toenmaoleg vijand zoegezag. Via ’n oetgebreide roondleiing woort dudelek wie dat kèrkhof oontstande waor en wat veur bezunder verhaole daobij te vertèlle zien. Eder graaf heet zien eige verhaol, zag de roondleier, al waore dao ouch nog hiele get graafstein mèt es opsjrif “Ein Deutscher Soldat”. Nao aofloup kós ederein nog e bezeuk bringe aon ’t documentatiecentrum en get drinke in ’t restaurant vaan ’t kèrkhof; e kèrkhof mèt e restaurant zuuste neet dèks meh hei is me ingeriech op väöl bezeukers die oet gans Duitsland koume aonreize.
Volgend jaor: Venlo
Um de kontakdaag aof te slete góng de houfkaar weer trök nao ’t dörp Ysselsteyn veur e smakelek buffet, boe ederein ziech oonder de klaanke vaan ’n accordeonduo te good aon doog. Es lèste voont de ceremonie plaots vaan ’t euverdrage vaan de Veldekevlag aon de krink dee volgend jaor de kontakdaag zal organisere, in dit geval de krink Venlo. Al mèt al ‘ne geslaagden daag, mèt daank aon Veldeke Krink Venroj veur de oetstekende organisatie.