Veldeke Krink Ech geit door mit “Loesterverhaole”

Begin van de coronaperiode, wie de lockdown de minse totaal äöverveel en in de greep haw, is VKE mit mitwirking van ’n aantal sjrievers en hertalers begósj aan ’n project “Loesterverhaole”. Dao-in waere al bekèndje of nuuj verhaole väörgelaeze in ’t Echs dialect. Óm de vervaeling van de ganse daag thoeszitte te óngebraeke kóste leje en anger belangstèllendje via de website van de krink die verhaole beloestere. Aanvankelik mit ’n frekwentie van ein verhaol p’r waek.

Intösse löptj dit verhaoleproject nog stieëds door en staon al mieë es 70 verhaole te beloestere. De frekwentie is trök gebrach nao ein verhaol p’r drie waeke, mer alle al eerder geplaatsjde verhaole zeen nog te beloestere. Die verhaole zeen óngerverdeildj in ’n paar categorieë, zoadet zeuke mekkelik geitj. Ein en anger woor mäögelik door ’n oetbreiding van de website mit ’n biedrage van de Rabobank Ech-Zöstere väör gooj ideeë tiedes de corona-lockdown.

Kort geleje is ’t verhaol “de Rampreis van Clara” geplaatsj, welk verhaol ouch in beeldj te bekieke en beloestere vèltj, ómdet ‘t ‘n opname betruf van de activiteit, die in augustus j.l. nog kós doorgaon en wobie verhaole waerdje väörgelaeze. Dit verhaol grip trök op ’n gebäörtenis bie de hoage waterstandj in de Maas, väörig jaor zomer.

Bie belangstèlling kiek op de website van Veldeke Krink Ech ónger “Loesterverhaole of klik de volgendje link.

← Ga terug