Veldeke Krink Ech op waeg nao Kersmis

Aafwiekendj van väörgaondje jaore slutj Veldeke Krink Ech dit jaor aaf mit ‘ne Adventsmiddig op zóndig 15 december en ’n dialekmès op vriedig 20 december. Op dae adventsmiddig kómme toch de óngerdeile aan bod, die eerder in de kerstaovendj zote: meziek, väördrachte en get te aete.

Zanggroep Bie-eingeraaptj

Väör de meziek höbbe w’r deze kieër de zanggroep “Bie-eingeraaptj” oetgenuuedigdj. Ze kómme oet ’t midde van oos provincie. Allemaol manne (en ein dame!) die lid zeen van ’n zangkoar, mer dit saort optraejes d’r nog bie doon. In ’t ieëste deil van hun optraeje zólle ze ’t in de sfeer van Advent en Kersmis haoje, mit dao tösse ‘n paar väördrachte.

In ‘t  twieëdje deil – nao de pauze – geit ‘t koar äöver op anger leedjes. Vanaaf de pauze zólle, gesprèdj äöver de middig, klein gerechjes waere geserveerdj, zoadet m’n neet mit hónger nao hoes hoof te gaon.

De middig vuntj plaats in de fieëstelike aangeklèdje zaal van de Pejjerhaof. Ouch is weer ruumdje väör leje die get wille laote huuere.  De Adventsmiddig op zóndig 15 december in de Pejjerhaof doertj van 15.00 – ongevieër 18.00 oer.

Dialekmès

De Dialekmès  is op vriedigaovendj 20 december óm 19.00 oer in de parochierkèrk van Pej. De kèrk äöpentj gastvrie de däöre väör leje van Veldeke, parochiane en anger belangstèllendje leefhöbbers van ’t dialek. Gebeje en gezange in dees Mèsvering kèntj m’n volge , mit baeje en mitzènge oet ’t beukske det bie de ingank van de kèrk zal waere aangereiktj. Wie gebroekelik zólle w’r ouch stil staon bie de gestórve leje van oze Krink.

Nao aafloup van de deenst is d’r väör de leje ‘n lekker tas kóffie en de gelaegenheid óm effe nao te kalle. Det doon w’r in de café van de Pejjerhaof.