Veldeke Krink Mestreech viert 40-jaoreg zjubelei

Mèt ‘ne klinkende show in d’n Theater aon ’t Vriethof heet de Veldeke Krink Mestreech zie 40-jaoreg zjubelei gevierd. In ’n anderhaaf oor dorende program kaom vaan alles veurbij vaan wat Veldeke Mestreech de aofgeloupe jaore zoe populair heet gemaak: stökskes cabberèt, bekinde leedsjes mèt Mestreechse tekste, verhaole en zelfs ‘ne kwis. Oetveurende waore de bekinde naome oet ’t Vastelaovends cabberèt, Will Wintjens, Phil Dumoulin, Els Ottenheijm, Elly Theunissen en netuurlek de veurzitter vaan de krink Hortense Brounts. Daoneve traoje ouch ’t koer en soliste vaan de Mestreechter Operètte Vereineging mèt versjèllende nómmers op.

De groete zaol waor vol bezat mèt lede vaan de krink Mestreech en genuujde gaste. Oonder die gaste waore de börgemeisterse vaan de stad, Annemarie Penn-te Strake en nog ’n börgemeisterse vaan Beek, Christine van Basten-Boddin, die daoneve ouch veurzitter vaan Veldeke Limburg is. De gouverneur had laote wete tot heer neet kós koume meh gelökkeg waor Theo Bovens wel dao. Es lid vaan de Krink naomelek. En heer is ouch nog besjermhier vaan Veldeke Limburg.

Pol Brounts

D’n aovend stoont ouch in ’t teike vaan d’n hoonderdste geboortedaag vaan Pol Brounts, eine vaan de opriechters vaan de krink en bekind vaan zien Mestreechse verhaole en gediechte. Zien dochter Hortense laos e verhaol vaan häöm veur en de tekste vaan ’n deil vaan de gezoonge leedsjes waore vaan zien hand. En aon ’t eind vaan d’n aovend woort e nui beukske geprizzenteerd mèt naogelaote veerskes vaan Pol, boebij Chrit Rousseau sjoen, passende teikeninge had gemaak. D’n titel Kiksjozerije had Pol zelf op de boondel pepèrkes gezat die in ‘ne rinkband op ziene buro waore aongetroffe. De börgemeisterse vaan Mestreech naom ’t ierste exemplaar in oontvaangs en leet mèrke tot ze al ’n aordeg wäördsje Mestreechs heet gelierd.

’t Waor al mèt as ‘nen aovend dee rech doog aon de verdeenste die Veldeke Mestreech veur de Mestreechter taol de aofgeloupe 40 jaor heet gehad. Dao waor ederein ’t nao aofloup vaan de veurstèlling bij ’t sjinke vaan de borrel euver eins.

← Ga terug