Veldeke Krink Mestreech viert 40-jaoreg zjubelei

Mestreech waor bepaold neet de ierste Limburgse plaots boe ‘ne lokaole krink vaan Veldeke woort opgeriech. In Venlo en Remund bestoonte al Veldekekring vaan kort nao d’n oorlog en ouch Heerle en Ech waore Mestreech wied veuroet. Meh in 1979 waor ’t daan eindelek zoewied. En de belaankstèlling oet de stad waor vaan begin aof aon groet. En die is in de loup vaan jaore allein mer gegreujd zoetot tot de Veldeke Krink Mestreech op dit  momint mèt mie es 1200 lede wiedeweg de groetse lokaole krink vaan Veldeke is.

De activiteite die de Veldeke Krink Mestreech organiseerde höbbe dao zeker aon bijgedrage. Op de ierste plaots netuurlek ’t succes vaan ’t Veldeke Vastelaovends cabberèt, wat 18 jaor laank vol zaole heet getrokke in de Bonbonnière. Meh ouch de aovende vaan Veldeke in Fort Sint Pieter stoon mennegein nog es bezunder vermakelek veur ouge. En de roondleiinge door de stad kóste ouch ummertouw op väöl interesse rekene. Um euver ‘t Groet Mestreechs Dictee nog mer te zwiege. ’t Ligk daan ouch veur de hand tot de krink Mestreech bij ’t viere vaan ‘t 40-jaoreg zjubelei medein gedach heet aon ’t organisere vaan ’nen aovend in d’n Theater um ’t zjubilei te viere mèt zien lede.

Zjubelei aovend

Deen aovend geit plaotsvinde op zaoterdag 13 aprèl in d’n Theater aon de Vriethof. ’n Speciaol kemissie is momenteel bezeg um ’t program veur te bereie. En ’t weurt leuk. ‘t Weurt ‘nen aovend mèt alderlei zakes. Dao weurt gezoonge, veurgedrage, gequiz en geprizzenteerd. En dao is ouch nog ‘ne naozit. Tege deen tied kriege Veldekelede ’n oetnudeging um keertsjes te bestèlle. Zörg tot geer op tied debij zeet. D’n theaterzaol is groet genóg meh veer wete vaan veurege kiere tot ‘r ouch gaw vollöp.

Beukske mèt veerskes vaan Pol Brounts

En daan is d’r nog ’n bezunder meneer um ’t zjubelei te viere. In 2019 is ’t naomelek ouch 100 jaor geleie tot aajd-veurzitter Pol Brounts in Mestreech gebore woort. In zien naolaotensjap höbbe veer nog ‘nen houp tekste gevoonde die noets zien oetgegeve. Noe is 2019 ’n sjoen gelegenheid um dao get aon te doen. Tijdens de zjubelei-aovend weurt daorum ouch e beukske geprizzenteerd mèt 40 korte veerskes vaan Pol Brounts. Die sjödde heer zoe oet ziene mouw meh dao zitte ouch perelkes tösse. Chrit Rousseau is zoe vruntelek gewees um bij die veerskes illustraties te teikene. ’t Weurt al mèt al e bezunder beukske. Tege deen tied te verkriege via de Veldeke Krink Mestreech.