Veldeke Limburg introduceert Veldeke Ierepenning

Dialekvereineging Veldeke Limburg zaot al ’n tiedsje verlege um ’n meneer boe-op ze lui die ziech bezunder verdeenstelek höbbe gemaak veur de Limburgse taol te iere. De vereineging kint al wel ’n ierelidmaostsjap meh dat is wie de naom al zeet veurbehawwe aon lede vaan Veldeke. Um ouch lui boete de ledekrink in ’t zunneke te kinne zètte is noe ‘nen ierepenning geïntroduceerd, al slut ’t lidmaostsjap de touwkinning ouch neet per se oet.

Oontwerp vaan Leo Disch

De penning is oontworpe door Leo Disch, dee neve Bendictijner monnik in ´t Kloester vaan Mamelis, ouch kunsteneer is dee ziech touwlègk op werk in broons en hout. Bekind werk vaan Disch zien ’t Eurokunstwerk bij Chateau St. Gerlach, ’t boorsbeeld vaan Antoon Coolen in Deurne en de Bokkerijersplaquette in Valkeberg.

Teks vaan e Minnelied

Bij ’t make vaan de Veldeke ierepenning heet Leo Disch ziech laote inspirere door ’n middeliewse aofbeelding vaan Henric van Veldeke en door d’n teks vaan ein van zien minneliederen, boe-in heer de krach vaan de taol bezingk:

Scone wort bit soeten sange
troosten dicke swaren moet
Die mach men gerne halden lange
want sie sin ons altoos goet

Ierste oontvenger nog geheim

De penning is in broons gegote en greun gepatineerd en kump in e sjoen duuske te zitte veur wee ‘m maag oontvaange. Wee d’n ierste penning touwgekind krijig is veurluipeg nog geheim meh veer hawwe uuch op de huugde es ‘t zoe wied is.